Интервенција на ТППЕ Битола

Територијалната противпожарна единица (ТППЕ) Битола, со целокупниот расположлив капацитет, повеќе од 33 часа интервенираше на пожарите што на 12 август 2026 година, околу 15:30 часот, избувнаа прво во селото Маково, потоа нови пожари се појавија и во селата: Граешница, Кукуречани, м.в Ергела, Гнеотино, а најтешка беше борбата со огнот во селата Ивањевци, Новоселани и Лознани. Интервенцијата на противпожарните екипи траеше до 14 август, до 01:00 часот по полноќ.

Поддршка од други екипи

Во текот на ноќта, како поддршка на битолските пожарникари, се приклучија екипи од ТППЕ Кавадарци, тимови за брз одговор од Дирекцијата за заштита и спасување со четири возила „пинцгауер“, како и жители од месното население.

Состојба со пожарите

Пожарите во сите села се целосно изгаснати. Изгаснат е и пожарот во селото Лопатица, каде што исто така интервенираше екипа на ТППЕ Битола.

Во селото Маково пожарот е локализиран. Сепак, на мал дел од непристапен терен, каде што има експлозивни направи од Првата светска војна, се’ уште забележлив е чад.

Информации од ТППЕ Битола

Од ТППЕ Битола информираат дека на сите локации станува збор за подметнати пожари, кои претставуваа сериозна закана за населените места.

Благодарност и апели

Општина Битола изразува голема благодарност до сите ангажирани противпожарни екипи за нивната храброст, пожртвуваност и професионалност. Со нивното навремено и ефикасно дејствување беа спречени големи опасности за куќите и другите објекти во селата на територијата на општините Могила и Новаци.

Општина Битола и ТППЕ Битола апелираат до сите граѓани да се однесуваат совесно и одговорно, да не палат оган на отворен простор, се со цел да се спречи повторување на вакви опасни состојби.