Голем шумски пожар во југозападна Шпанија денеска се прошири надвор од контролата на пожарникарите, соопштија регионалните власти, додека високите температури и силните ветрови разгореа други пожари низ целата земја.

Во пожарот во андалузискиот регион досега изгореа речиси 20.000 хектари. Шефот на службите за итни случаи, Антонио Санц, им рече на новинарите дека борбата против пожарот околу средновековниот град Ниебла е како „трака со пречки на долги стази“ и може да трае неколку дена.

Тој додаде дека силните налети на ветер на предизвикувачкиот терен дуваа жар во сите правци, предизвикувајќи нови, секундарни пожари. Речиси 500 луѓе се евакуирани од погодената област, додека се разгледуваат дополнителни превентивни мерки, рече Санц.

По последователните топлотни бранови што го погодија поголемиот дел од Европа, медитеранската земја се соочува со катастрофална сезона на шумски пожари. Според проценките од Европскиот информативен систем за шумски пожари (EFFIS), повеќе од 244.000 хектари природни површини изгореа во Шпанија оваа година во околу 400 пожари.

Ова е шест пати поголема површина од површината изгорена во истиот период минатата година во Шпанија.

Рекордна топлина и суша

Низ цела Европа, рекордната топлина и суша ова лето, за кои научниците велат дека се влошени поради климатските промени, предизвикаа сериозни проблеми за производството на електрична енергија, поморскиот транспорт и системите за јавно здравје.

И други шумски пожари се активни во Шпанија, од кои најзагрижувачки се оние во централната провинција Сеговија и во југоисточната провинција Кастељон.