Иако повремената утринска главоболка може да се појави од различни причини и најчесто не е причина за загриженост, нејзиното често повторување може да укажува на одредени здравствени проблеми или животни навики кои бараат внимание.

Апнеја при спиење

Како што наведува „Health“, една од вообичаените причини за утринските главоболки е апнејата при спиење, состојба при која повремено престанувате да дишете во текот на ноќта. Вашето тело ве буди за повторно да можете да почнете да дишете.

Можно е воопшто да не сте свесни дека тоа се случува. Проверете со вашиот партнер или пријател дали силно 'рчите, бидејќи тоа може да биде знак.

Имајте предвид дека не секое 'рчење е знак за апнеја при спиење. Лекарот може да ве упати на испитување на спиењето, што е најточниот начин за дијагностицирање на оваа состојба.

Несоница

Веројатно сте слушнале за несоницата, често нарушување на спиењето кое може да предизвика тешкотии при заспивање или одржување на сонот, или да го спречи квалитетниот сон. Главоболките се еден од здравствените проблеми предизвикани од оваа состојба.

Симптомите на несоница вклучуваат тешко заспивање, кратко спиење или прерано будење. Исто така, може да се будите поспани и да се чувствувате уморни во текот на денот.

Шкрипење со забите

Шкрипењето со забите, познато и како бруксизам, во текот на ноќта може да предизвика болка во мускулите на вилицата или во темпоромандибуларниот зглоб. Таа болка може да доведе до главоболка.

Можеби не знаете дека шкрипите со забите, но обрнете внимание на болка во увото, чувствителност на мускулите, чувствителност на забите или болка во вилицата. Сето тоа се симптоми на бруксизам. Стоматологот може да го открие проблемот доколку постои.

Алергии

Вашите утрински главоболки можат да бидат предизвикани и од алергени. Изложеноста на грини за време на спиењето исто така може да ве разбуди со главоболка поради затнатите синуси што ги предизвикуваат.

Доколку имате алергии, обидете се да користите постелнина отпорна на алергени – специјални навлаки за перници, навлаки за душеци и јоргани дизајнирани да ве заштитат од изложеност на грини, а постелнината перете ја почесто. Алерголог може да ви помогне да пронајдете дополнителни начини за ублажување на симптомите.

Мигрена

Иако овие повторувачки главоболки можат да се појават во кое било време, мигрените почесто се јавуваат наутро. Најчесто се појавуваат на едната страна од главата, со умерена до силна пулсирачка или прободувачка болка.

Други знаци дека можеби имате мигрена вклучуваат мачнина, слабост и чувствителност на светлина и звук. Постојат и можни симптоми кои можат да се појават и до 24 часа пред главоболката, како што е аурата.

Недостаток или премногу сон

Премногу или премалку сон може да биде поттикнувач за тензиските главоболки. Тие често се чувствуваат како лента што силно ви ја стега главата. Исто така, може да почувствувате болка или непријатност во главата, скалпот или вратот.

Депресија и анксиозност

Депресијата и анксиозноста исто така можат да предизвикаат тензиски главоболки наутро. Доколку забележите дека главоболките се јавуваат во период кога доживувате или очекувате стрес (на пример, наутро пред да одите на работа), разговарајте со лекар за да се процени дали причината е состојба поврзана со менталното здравје.