Постои научно објаснување зошто губењето на последните неколку килограми е толку тешко.

Разбирање на забавеното слабеење

Кога телото ќе препознае нешто што го загрозува неговиот опстанок, автоматски активира низа физиолошки реакции за да се заштити. Така, кога ќе ја промениме исхраната и ќе го намалиме внесот на калории, телото регистрира дека губиме тежина и тоа го доживува како потенцијална закана. Затоа се приспособува така што го забавува метаболизмот, троши помалку енергија и ја намалува брзината со која слабееме.

Истовремено, телото лачи повисоки нивоа на хормонот на гладот, кој го зголемува апетитот и го поттикнува зачувувањето на масните резерви. Истражувањата покажуваат дека слабеењето станува особено потешко по третиот месец од диетата. Кога килограмите почнуваат да се губат побавно, тоа е знак дека е време да промените нешто во вашата рутина.

Преиспитајте ја целта за слабеење

Првата и најважна работа што можеби ќе треба да ја промените кога губењето килограми ќе забави е вашата дефиниција за здрава телесна тежина. Запрашајте се: Што е толку посебно во тежината што се обидувам да ја достигнам?

Многу луѓе го користат индексот на телесна маса (BMI) за да ја постават својата цел за слабеење, но бројката на вагата – како и резултатот што ќе го добиете кога ќе ги внесете вашата тежина и висина во „BMI“ калкулаторот – не ја кажуваат целата приказна. Тоа е така затоа што „BMI“ не ги зема предвид уште две многу поважни мерки: процентот на телесни масти и распределбата на мастите во телото.

Ако редовно сте вежбале како дел од вашиот план за слабеење, најверојатно сте добиле мускулна маса или сте го подобриле односот меѓу мускулите и мастите, а мускулите тежат повеќе од масното ткиво, што директно влијае на бројката на вагата. Исто така, можно е да се промени и начинот на кој мастите се распределуваат во телото, со што се намалува количината на нездрави масти што се таложат околу стомакот и внатрешните органи, а со тоа се намалува и ризикот од различни заболувања.

Затоа земете метар, проверете како ви стои облеката и размислете како се чувствувате, за да процените дали навистина треба да ги изгубите тие последни неколку килограми. Обем на половината од околу 80 сантиметри кај жените и околу 90 сантиметри кај мажите се смета за идеален.

Фокусирајте се на големината на оброците во текот на денот

Во моментов многу популарен е повремениот пост. Тоа често значи дека појадокот прв исчезнува од менито во обид да се намали внесот на калории и да се скрати временскиот период во кој се јаде. Но, кога јадете и колку јадете во секој оброк е исклучително важно, а појадокот е најважниот оброк во денот. Контролирани истражувања покажале дека токму тогаш телото најдобро ги искористува внесените калории – всушност, ги согорува два и пол пати поефикасно наутро отколку навечер.

Размислете за повеќе тренинзи за сила

Ако се потпирате само на исхраната за да ослабете, можно е да изгубите и мускулна маса, а не само масно ткиво. Тоа го забавува метаболизмот и го отежнува долгорочното одржување на телесната тежина.

Секоја физичка активност значително ќе помогне во зачувувањето на мускулната маса, но важно е во вашата неделна рутина да вклучите и неколку дена вежби за сила.

Контролирајте го стресот

Стресот може сериозно да го наруши вашиот успех во слабеењето. Зголеменото ниво на стрес го поттикнува создавањето на кортизол, хормон кој го стимулира таложењето масти и предизвикува нездрава желба за храна.

Најдобриот начин за контрола на стресот е редовното вежбање.