Колагенот е еден од најважните протеини во човечкиот организам бидејќи придонесува за еластичноста на кожата, здравјето на зглобовите и цврстината на косата, ноктите и сврзното ткиво. Бидејќи неговото природно производство се намалува со годините, многумина настојуваат да го надоместат неговиот внес преку секојдневната исхрана.
Најголеми количини колаген се наоѓаат во намирниците од животинско потекло, а правилната подготовка може дополнително да ја зголеми неговата искористливост.
Еден од најдобрите природни извори на колаген се домашните чорби и супи од говедски или телешки коски, 'рскавица и зглобови. Долготрајното варење, кое трае меѓу шест и 12 часа, овозможува ослободување на колаген, желатин, аминокиселини и минерали, поради што ваквите чорби се исклучително хранливи.
Меѓу намирниците богати со колаген се издвојува и пивтијата. Ова традиционално јадење, подготвено без дополнителни адитиви, содржи големи количества природен колаген, кој може да биде вреден дел од урамнотежената исхрана.
Пилешкото месо, исто така, претставува добар извор на овој протеин, особено деловите како што се кожата, крилцата и вратот, кои содржат многу сврзно ткиво.
Рибата е уште една намирница богата со колаген, а рибниот колаген организмот полесно го вари. Особено се препорачуваат кожата од лосос, како и домашните рибји чорби.
Освен намирниците што директно содржат колаген, постојат и оние што го поддржуваат неговото природно создавање во организмот. Меѓу нив се јајцата, особено жолчката, полномасното млеко, путерот, свежото сирење, павлаката, говедското и телешкото месо.
Овие намирници содржат аминокиселини како што се глицин и пролин, кои учествуваат во создавањето на колагенот. Затоа, секогаш кога е можно, предност треба да им се даде на квалитетните и домашни намирници.
