На Росовиот остров, на околу 1.350 километри од Јужниот Пол, се наоѓа Еребус, најјужниот активен вулкан во светот. Висок е 3.792 метри, а во неговиот кратер со децении има езеро од лава.

Покрај лавата, пепелта и топлите гасови, Еребус секој ден исфрла околу 80 грама златен прав во форма на микроскопски кристали. Ветровите можат да ги однесат до 1.000 километри од вулканот, наведува „Science Alert“.

Единствениот вулкан што исфрла „чисто злато“

Присуството на злато во вулканските гасови не е реткост, а италијанската Етна испушта и до 2,5 килограми злато дневно.

Сепак, разликата е во тоа што кај другите вулкани златото е врзано во хемиски соединенија или гасови, додека Еребус исфрла кристали од елементарно или чисто злато. Засега, тоа е единствениот вулкан каде што овој феномен е директно потврден.

Мистерија што ги збунува научниците

Сè уште не е познато како златото се одвојува од магмата и формира кристали со големина од 20 до 60 микрометри.

Една теорија вели дека златото во магмата формира соединенија со хлор, кои заедно со вулканските гасови стигнуваат до атмосферата, каде што се ладат и кристализираат. Проблемот е што гасовите содржат многу мали количини злато, па затоа таков процес е малку веројатен.

Друга претпоставка е дека кристалите се формираат во кората што се формира на површината на лавиното езеро, а потоа нагорните гасни текови ги фрлаат високо во атмосферата.

Иако поминаа повеќе од 30 години од откривањето на овој феномен, научниците сè уште немаат дефинитивен одговор за тоа како Еребус создава и исфрла ситни кристали од чисто злато.