Научниците открија: Ова „чудо“ од зеленчук го топи салото и го регулира шеќерот во крвта

Студијата на италијанските научници, објавена во научното списание „Fitoterapia research“, е спроведена под водство на Универзитетот во Пиза, со учество на истражувачи од Болоња, Фиренца и Неапол, објавува „Ansa“.

Научниците го проучувале ефектот на глукоеруцинот, соединение кое природно се наоѓа во зеленчукот од семејството крстоцветни растенија, вклучувајќи ја руколата, брокулата и зелката.

Истражувањето е спроведено на глувци со дебелина предизвикана од исхрана богата со масти.

По 10 недели, животните кои примале глукоеруцин имале помало зголемување на телесната тежина во споредба со контролната група, како и пониски вредности на шеќер во крвта и триглицериди, со помало акумулирање на масно ткиво во абдоминалната област.

Истражувачите, исто така, забележале значајни промени во масното ткиво.

Клетките на масното ткиво биле помали, помалку погодени од воспалителни процеси и поактивни во потрошувачката на енергија.

Според резултатите од студијата, глукоеруцинот стимулира процес познат како „кафеавење“ на белото масно ткиво, при што ги добива карактеристиките на кафеаво масно ткиво, кое троши повеќе енергија и придонесува за поефикасен метаболизам.

Авторите на истражувањето наведуваат дека оваа супстанца не само што го намалува акумулирањето на масти, туку и го прави масното ткиво метаболички поактивно, што му овозможува на телото поефикасно да согорува калории наместо да ги складира.

Студијата, исто така, покажала зголемено ниво на хормонот иризин кај животните кои примале глукоеруцин.

Иризинот го произведуваат мускулите и е познато дека го стимулира трошењето на енергија и согорувањето на калории.

Научниците истакнуваат дека се потребни дополнителни истражувања за да се потврдат ефектите на глукоеруцинот кај луѓето.