Американското Министерство за одбрана денеска го објави третиот пакет декласифицирани документи за неидентификувани аномални појави (UAP), официјалниот термин што американските власти го користат за појави на небото, во вселената или под вода кои не можат веднаш да се објаснат. Во последните години, терминот UAP го замени популарниот израз НЛО (неидентификуван летечки објект), кој често се поврзува со вонземјани.

Документите од денеска се достапни на специјалната интернет-страница на американската влада и претставуваат продолжение на објавувањето историски досиеја во рамки на програмата за декласификација и известување за средби со UAP.

Меѓу објавените материјали се наоѓа и видеоснимка од инцидент од јули 2025 година на североистокот на САД. Според декласифициран извештај на ФБИ, еден сведок по враќањето од работа забележал необично силна светлина која лебдела на височина од околу осум метри во неговиот двор. Откако излегол од автомобилот, му се придружил уште еден сведок и двајцата набљудувале, како што опишале, bлескава црвена сфераb со пречник од околу еден метар и бело јадро.

Подоцна забележале уште една идентична сфера над првата. Кога почнале да снимаат со мобилен телефон, двата објекта почнале да се движат кон запад над врвовите на дрвјата. Нивното движење било целосно без звук и синхронизирано, како да биле поврзани. Пред да исчезнат од видикот, сведоците тврдат дека двете сфери се споиле во една.

Според извештајот на ФБИ, лицата што го пријавиле настанот се сметаат за веродостојни сведоци, а случајот се случил во област каде и претходно биле регистрирани слични пријави за необјаснети појави. Министерството за одбрана наведува дека станува збор за еден од нерешените случаи кои и понатаму се водат како UAP.

Покрај видеото, објавени се и фотографии од инцидентот, како и документација што содржи изјави од сведоците и извештаи од истражителите. Во документите има детални описи на забележаните објекти, околностите под кои биле видени и проценките на надлежните агенции кои случајот го евидентирале како нерешена неидентификувана аномална појава.

Оваа слика е уметничка интерпретација на инцидент од 2022 година кој можеби вклучувал неидентификувани аномални појави (UAP), а бил пријавен во близина на Colorado Springs во сојузната држава Colorado. Сликата е изработена врз основа на опис на настанот од прва рака содржан во документот BI-UAP-D002, FD-1057, Нерешен извештај за UAP, Колорадо Спрингс, 2022. Фото: Американско Министерство за одбрана.

Два силно црвени светлечки објекти лебделе ниско над хоризонтот

Меѓу новите материјали има и снимка од март 2022 година, исто така од североистокот на САД. Според извештајот на ФБИ, еден сведок околу 19:20 часот забележал два силно црвени светлечки објекти кои лебделе ниско над хоризонтот на оддалеченост од околу 750 метри.

Според неговото сведочење, двата објекта најголемиот дел од времето мируваале. Долниот објект полека се движел во однос на горниот, создавајќи впечаток на ротација. Сведокот не слушнал никаков звук. Целиот настан бил снимен со iPhone 12 Pro на ретко населено подрачје што добро го познавал.

Пентагон објави и фотографии и службена документација поврзана со случајот. Во извештајот се наведува дека ФБИ го смета сведокот за многу веродостоен. Случајот е поврзан со повеќе слични пријави од истиот регион на североистокот на САД, кои исто така се дел од декласифицираните документи.

Во објавените материјали има и други нерешени случаи, вклучувајќи извештаи за црвени сфери што лебделе над шуми и населени места, објекти што се движеле без звук и појави кои ниту по истрагата не добиле конечно објаснување.

Сведок снимил мистериозен објект кој се распаднал на повеќе светла

Меѓу документите се наоѓа и снимка од ноември 2021 година. Според извештајот на ФБИ, еден сведок околу 5 часот наутро забележал многу силен светлечки објект ниско над хоризонтот на оддалеченост од околу 600 метри.

На почетокот изгледал како едно интензивно светло, но подоцна се чинело дека се раздвојува на повеќе помали светла кои меѓусебно се движеле и ротирале на неправилен начин. Сведокот изјавил дека објектот во текот на целиот настан полека се движел од левата кон десната страна на хоризонтот.

Настанот бил снимен со рачно држен iPhone 12 Pro, поради што на снимката има и потресување на камерата. ФБИ наведува дека локацијата му била добро позната на сведокот и се наоѓала во ретко населено подрачје.

Според проценката на ФБИ, случајот е поврзан со повеќе слични пријави за необјаснети појави од истиот регион на североистокот на САД, кои исто така се вклучени во најновиот пакет декласифицирани материјали на Министерството за одбрана.

Страницата собори рекорди по посетеност

Во изјава потпишана од портпаролот на Пентагон, Шон Парнел, се наведува дека страницата од нејзиното отворање на 8 мај забележала повеќе од 1,7 милијарди посети од целиот свет.

Големиот интерес на јавноста се поврзува со долгогодишната фасцинација со необјаснетите воздушни појави, но и со политиката на поголема транспарентност што ја промовира администрацијата на Трамп.

„Министерството ќе продолжи да објавува дополнителни документи. Ние и нашите партнерски агенции веќе активно работиме на следниот пакет материјали“, порача Парнел.

Американските власти во последните години објавија повеќе извештаи за UAP-појави, но досега не се пронајдени докази дека тие се поврзани со вонземски живот. Голем дел од случаите подоцна биле објаснети како природни феномени, летала, воени проекти или погрешно протолкувани сензорски податоци, додека дел од пријавите и натаму остануваат нерешени.