Режисерот Квентин Тарантино отворено го изрази своето незадоволство од повеќето филмови што денес излегуваат од Холивуд.
Во напис за списанието „Sight & Sound“, Тарантино призна дека речиси е невозможно да погледне нов филм без веднаш да го критикува.
„Недостатоците, неверодостојноста, додворувањето на публиката, погрешно избраните актери или едноставно глупостите обично го уништуваат секој нов филм што излегува од безвкусната фабрика за колбаси што некогаш се нарекуваше Холивуд. Деновиве самиот концепт на филмот повеќе ме поттикнува на презир отколку на великодушност. И тоа е сосема оправдано бидејќи, во споредба со тоа, филмовите од последните шест години прават 80-те години да изгледаат како 30-те“, објасни режисерот.
Тарантино додаде дека во последните неколку години погледнал неколку филмови што му се допаднале, како што се „West Side Story“ (2021) и „Horizon: An American Saga Chapter 1“ и „Horizon: An American Saga Chapter 2“ (двата од 2024 година), но дека ниту еден не успеал да му го пружи искуството што некогаш го сакал во филмската уметност и затоа вели дека деновиве повеќе сака да чита книга.
Сепак, постои еден филм што неодамна го привлекол вниманието на Тарантино. Тоа е криминалистичката драма на „Netflix“ „The Rip“, во режија на Џо Карнахан, со Бен Афлек и Мет Дејмон во главните улоги.
Филмот, кој е достапен на платформата од јануари, следи двајца полицајци од Мајами-Дејд кои откриваат корупција во сопствените редови поврзана со 20 милиони долари картелски пари. Во филмот играат и Стивен Јеун, Тејана Тејлор, Саша Кале и Кајл Чендлер.
„Излезе нов напнат филм што навистина ме освои и ме држеше во неизвесност цело време. Филмот е возбудлив полициски трилер со нова премиса што успева да ја раскаже приказната на навистина паметни начини. Ми се допадна целиот пакет: режијата на Карнахан, одличната актерска екипа, изгледот на филмот, но вистинската силна компонента на оваа извонредна целина е сензационалното сценарио на Карнахан и Мајкл Мекгрејл“, наведе тој.
Тарантино моментално работи на театарската претстава „The Popinjay Cavalier“, чија светска премиера треба да биде изведена во лондонскиот Вест Енд во 2027 година.
Дејството е сместено во Европа во 1930-тите години. Што се однесува до неговата филмска кариера, режисерот сѐ уште не открил кој ќе биде неговиот десетти и последен филм пред пензионирањето од филмскиот свет.
