Почина Сејда Бешлиќ, осум месеци по смртта на нејзиниот сопруг Халид

Тешко е со зборови да се опише нивната љубов, а можеби најдобро ја опиша токму Халид. Иако во текот на својата кариера отпеа десетици безвременски хитови, често знаел да им каже на пријателите: „Сејда е мојата најголема песна“.

Во секоја песна на Бешлиќ за љубовта и копнежот имаше барем малку од Сејда. Не е случајно ниту тоа што последната песна што Халид ја објави пред смртта го носеше насловот „Sejda“.

„Сè уште си млада како некогаш, Сејдо, сè уште си убава како оној ден, кога покрај мене сви гнездо, кога мене ми го подари своето срце“, гласат стиховите од песната.

Иако ретко се појавуваше во јавноста, Сејда беше неговото мирно пристаниште и потпора низ целиот живот. Беше покрај него и во најубавите, но и во најтешките моменти по тешката сообраќајна несреќа, во годините што носеа нови предизвици и тогаш кога рефлекторите се гасеа.

Како што целиот живот го поминаа заедно, така Халид и Сејда ќе бидат погребани еден до друг. Многумина сметаа дека Халид треба да почива во Алејата на великаните, но легендарниот пејач посакуваше поинаку.

Сакаше покрај него да биде неговата Сејда. Со тоа уште еднаш покажа колку ја сакал и колку нивната љубов, верност и заедништво биле поголеми од секоја слава.

Халид и Сејда Бешлиќ беа во брак речиси 50 години. Се запознале во 1977 година во едно кафуле во Сараево, а таа тогаш работела во фабрика за чоколади.

Поради љубовта одлучила да ја напушти работата. Ретко се појавуваше во јавноста, но претходно во интервју за „Večernji list“ откри детали за нивното запознавање. Се венчале по неколку месеци врска, а потоа го добиле синот Дино.

„Не се познававме долго. Всушност, тој и неговото друштво ме наместија. Еднаш излеговме на роденденот на мојата сестра, за Осми март. Јас бев фина, тие нешто си пиеја, а јас само сок. Во еден момент неговото друштво рече: ‘Некого вечерва ќе ожениме’, а Халид ме праша: ‘Ќе се омажиш ли ти?’ Јас не реагирав. Повторно ме праша: ‘Ќе се омажиш ли за мене?’“, раскажа таа.