Американскиот претседател Доналд Трамп е во одлична здравствена состојба, се наведува во извештајот од неговиот лекар кој го објави Белата куќа по неодамнешниот медицински преглед.

Според документот, кај 79-годишниот претседател се забележани благи отечени потколеници и благи модринки на рацете, но лекарите оценуваат дека неговата општа здравствена состојба останува стабилна и добра.

„Одлично здравје и нормални функции“

Во извештајот на д-р Шон Барбабела се наведува дека Трамп има „уредна функција на срцето, белите дробови и нервниот систем“, како и „многу добро општо физичко здравје“.

„Претседателот Трамп останува во одлично здравје и целосно способен да ги извршува своите должности како врховен командант и шеф на државата“, се наведува во медицинскиот допис.

Лекарот додава дека најголемиот дел од резултатите се во нормални граници.

Благи отекувања и модринки поврзани со терапија

Во извештајот се посочува дека кај Трамп е регистрирано благо отекување на потколениците, состојба која, според лекарите, е подобрена во однос на претходната година. Модринките на рацете, како што се наведува, се во согласност со „мала иритација на меките ткива“ поради често ракување, како и употреба на аспирин за кардиоваскуларна превенција.

Претседателот е висок околу 190 сантиметри, тежи околу 108 килограми, има пулс од 73 отчукувања во минута и користи лекови за контрола на холестеролот.

Нормални когнитивни функции

Според извештајот, невролошкиот преглед покажал нормална ментална состојба, а тестот за когнитивни способности резултирал со максимални 30 од 30 поени. Лекарот нагласува дека нема индикации за нарушувања на менталните функции.

Јавноста внимателно го следи здравјето на претседателот

Овој медицински преглед беше внимателно следен од јавноста, особено по претходни фотографии кои покажале отекување на нозете и модринки на рацете. По прегледот, самиот Трамп на својата социјална мрежа „Трут Соушл“ изјави дека резултатите се одлични.

„Го завршив со мојот редовен преглед во воениот медицински центар Волтер Рид. Сè беше проверено СОВРШЕНО. Благодарам на одличните лекари и персоналот“, напиша тој.

Прашања кои остануваат отворени

Дел од американските медиуми забележуваат дека во новиот извештај не се споменува причината за третманот на кожата на вратот на претседателот кој беше извршен во март, ниту пак дали е направен нов преглед со магнетна резонанца.

Минатата година, по слична посета на болницата, Белата куќа појасни дека претседателот всушност бил подложен на компјутерска томографија (КТ) на срцето и абдоменот за дефинитивно да се исклучат кардиоваскуларни проблеми, при што наодите биле уредни.

Трамп, кој е најстарата личност што некогаш стапила на претседателската функција во САД, честопати во јавноста се претставува како поенергичен од неговиот претходник Џо Бајден, кој ја напушти Белата куќа минатата година на 82-годишна возраст.