Тројца латвиски алпинисти загинаа, а еден е во критична состојба, откако паднале за време на искачување на планината Мекинли во Националниот парк и резерват Денали на Алјаска, соопштија американските власти и Латвиската алпинистичка федерација.

Несреќата се случила во средата, кога четворица членови на седумчлена експедиција паднале во близина на превојот Денали, на околу 640 метри под врвот на планината Мекинли, највисокиот врв во Северна Америка.

Според американската Служба за национални паркови, преживеаниот алпинист бил спасен од планински предел на надморска височина од околу 5.400 метри, по што бил пренесен во болница. Латвиската алпинистичка федерација соопшти дека тој се наоѓа во критична состојба.

Од Службата наведоа дека засега нема да бидат објавени идентитетите на загинатите, сè додека нивните семејства не бидат официјално известени.

Тројцата останати членови на експедицијата, кои не биле повредени, успеале безбедно да се вратат во кампот.

„Ненадоместлива загуба за латвиската алпинистичка заедница“

Латвиската алпинистичка федерација трагедијата ја опиша како тежок удар за спортската јавност во земјата.

„Ова е неописливо болна и ненадоместива загуба за целата латвиска алпинистичка заедница“, се наведува во соопштението на федерацијата.

Една од најпредизвикувачките планини во светот

Планината Мекинли се наоѓа во срцето на Националниот парк Денали и важи за една од најтешките планини за искачување поради екстремните временски услови, силните ветрови и ниските температури.

Локалното население и домородните народи на Алјаска ја нарекуваат Денали, што во превод значи „високиот“. Сепак, планината официјално била именувана како Мекинли во чест на Вилијам Мекинли, 25-тиот претседател на Соединетите Американски Држави.