Може ли некој да им застане на патот?
Фудбалерите на Кристал Палас синоќа го освоија својот прв европски трофеј во историјата на клубот, откако во финалето на Конференциската лига во Лајпциг го совладаа Рајо Ваљекано.
Големи денови за клубот од јужен Лондон, на кој летово му беше забрането да настапува во заслужената Лига Европа, па наместо тоа беше спуштен едно ниво подолу. Причината беше повеќекратната сопственост, односно фактот што Лион, со кој управува истиот сопственик Џон Текстер, исто така успеа да избори пласман во Лига Европа, и тоа од подобра позиција во своето првенство.
Сепак, тоа не испадна толку лошо за Палас, кој сега се радува на европски трофеј, а доколку Арсенал ја освои титулата во Лигата на шампионите, тоа ќе значи 3 од 3 за англиските тимови оваа сезона, бидејќи, да потсетиме, Астон Вила ја освои Лига Европа.
Сите тие успеси значат и огромен број англиски екипи во европските натпреварувања следната сезона. Благодарение и на коефициентот и на меѓународните трофеи, Англичаните во наредната кампања ќе имаат дури девет претставници.
Речиси половина од Премиер лигата ќе учествува во натпреварувањата под капата на УЕФА, што е навистина фасцинантна бројка.
Во Лигата на шампионите ќе настапуваат: Арсенал, Манчестер Сити, Манчестер Јунајтед, Астон Вила и Ливерпул.
Во Лига Европа ќе ги претставуваат: Кристал Палас, Борнмут и Сандерленд, додека во Конференциската лига ќе игра Брајтон.
