Индиската политика доби необична маскота, а тоа не е лотосот на владејачката партија „BJP“, ниту симболот на раката на опозициската партија позната како Конгрес.

Според „BBC“, станува збор за бубашваба — тврдоглава, омразена и бестрашна — која неодамна стана неочекуван, но препознатлив политички симбол меѓу младите Индијци на интернет.

Инсектот привлекол внимание по контроверзните коментари на Сурија Кант, претседател на Врховниот суд на Индија.

Тој наводно ги споредил невработените млади луѓе што се насочуваат кон новинарство и активизам со бубашваби и паразити.

Подоцна појаснил дека мислел на луѓе со „лажни дипломи“, а не на индиската младина.

Коментарите масовно се ширеле на социјалните мрежи, предизвикувајќи негодување, шеги и духовита политичка побуна наречена Партија на народот бубашваби („CJP“).

Не е класична партија, туку сатирично движење

Ова не е формална политичка партија, туку претежно сатиричен виртуелен колектив.

Критериумите за членство се: невработеност, мрзеливост, хронично користење социјални мрежи и „способности за професионално изразување“.

Движењето го основал Абхиџит Дипке, експерт за политички комуникации и студент на Универзитетот во Бостон.

Идејата, како што вели, започнала како шега.

Пред да се пресели во САД, работел со партијата „Aam Aadmi“ („AAP“), политичка организација создадена од антикорупциско движење и позната по силното присуство на социјалните мрежи.

„Помислив дека сите треба да се собереме, можеби само да започнеме платформа“, изјавил тој за „BBC“.

„CJP“ за само неколку дена собрала десетици илјади пријави преку „Google“ формулар, благодарение на хаштагот #MainBhiCockroach („И јас сум бубашваба“) и поддршката од опозициски лидери.

Повеќе следбеници од владејачката партија

Движењето брзо се проширило и надвор од интернетот.

Млади волонтери почнале да се појавуваат облечени како бубашваби на акции за чистење и протести.

Профилот на „Instagram“ има повеќе од 10 милиони следбеници, со што го надминал официјалниот профил на „BJP“, која важи за најголема политичка партија во светот според бројот на членови.

Нејзината „Instagram“ страница има околу 8,7 милиони следбеници.

За поддржувачите, движењето претставува, како што рекол еден симпатизер, „здив на свеж воздух“ во политичка култура што многумина ја доживуваат како непријателска кон различното мислење.

Меѓу поддржувачите има и опозициски политичари како Махуа Моистра и Кирти Азад, како и познатиот адвокат Прашант Бушан.

Критики и сомнежи

Критичарите, пак, го отфрлаат движењето како интернет-политички театар поврзан со опозицијата.

Тие потсетуваат на претходната поврзаност на Дипке со „AAP“, тврдејќи дека не станува збор за спонтан бунт, туку за внимателно спакувана дигитална политика.

Сепак, движењето стана симбол на генерацискиот замор кај многу млади Индијци, кои велат дека постојано се изложени на политика на интернет, но ретко чувствуваат дека навистина се претставени во неа.

Половина од Индија е помлада од 30 години

Индија има една од најмладите популации во светот.

Половина од 1,4 милијарди жители се помлади од 30 години.

Но формалното политичко учество и понатаму останува ограничено.

Едно неодамнешно истражување покажало дека 29 проценти од младите Индијци целосно избегнуваат политички ангажман, додека само 11 проценти се членови на некоја политичка партија.

„Луѓето се фрустрирани бидејќи чувствуваат дека никој не ги слуша и не ги претставува“, изјавил Дипке.

Во последните години низ Јужна Азија избувнаа младински протести што урнаа влади во Шри Ланка, Непал и Бангладеш, најчесто поттикнати од незадоволство поради работните места и високите цени.

Иако Дипке ги отфрла споредбите со случувањата во Непал или Шри Ланка, нагласува дека фрустрацијата кај младите во Индија е реална, но денес се изразува преку интернет.

„Генерацијата З се откажа од традиционалните политички партии и сака да создаде сопствен фронт на јазик што го разбира“, вели тој.

Зад шегите стојат сериозни барања

Зад духовитите слогани се кријат препознатливи политички барања: одговорност, медиумски реформи, транспарентност на изборниот процес и поголема застапеност на жените.

За многумина изборот на маскотата е сосема логичен.

Бубашвабата не е амбициозна, туку едноставна: отпорна, прилагодлива и способна да преживее во непријателски услови со многу ниски очекувања.

Од Грило и Зеленски до политиката како спектакл

Секако, користењето хумор за претставување политички проблеми не е ништо ново.

Комичарот Бепе Грило во Италија го претвори анти-естаблишмент хуморот во „Движењето пет ѕвезди“, додека во Украина Володимир Зеленски помина пат од актер што игра фиктивен претседател до реален лидер на државата.

Ерата на Доналд Трамп повторно ја отвори дебатата дали сатирата веќе почнала да се распаѓа под тежината на политичката реалност, која и самата често изгледа како пародија.

Во Индија политичарите одамна ја прифатија моќта на спектаклот — од медитации во хималајски пештери до менување партии среде сцени во кои пратеници се туркаат во автобуси или се затвораат во хотели.

Онлајн кампањите се потпираат на внимателно осмислени вирални видеа и впечатливи слогани создадени за максимален досег.

Политичко движење со тема инспирирана од инсекти можеби звучи чудно, но токму тоа објаснува зошто толку брзо се прошири.

Не затоа што младите Индијци сакаат уште една политичка партија, туку затоа што многумина бараат јазик преку кој ќе можат да го изразат своето незадоволство.

„Мислам дека „CJP“ е само почеток. Младите се заситени од сегашниот политички систем и ќе се појавуваат уште повеќе младински организации – вели нејзиниот основач.

Други, пак, остануваат скептични и веруваат дека движењето ќе исчезне исто толку брзо колку што и се појавило.

Но „CJP“ веќе направи нешто необично во индиската политика: дел од младите конечно почувствуваа дека некој ги гледа и слуша.

Некогаш политичкиот гнев на младите создавал манифести, а во 2026 година понекогаш организира и забави со маскоти на инсекти.