Градоначалникот на Општина Центар, Горан Герасимовски, им врачи награди на 12 вработени, воспитувачки, негувателки, стручни соработници и помошно-технички персонал од центарските градинки во Општина Центар, за нивната исклучителна посветеност, грижа и ангажман во воспитувањето и развојот на најмладите.

Грижата за најмладите

„Вие сте темелот врз кој се гради секое детство. Во градинките се стекнуваат првите навики, првите другарства и првите вредности. Вашата улога е исклучително одговорна, затоа што токму од вас започнува развојот на секое дете. Се надевам дека овие награди ќе бидат дополнителен поттик во вашата благородна мисија“, порача градоначалникот Герасимовски, на свечената приредба во ЈУДГ ОЦ „13 Ноември“.

Инвестиции во градинките

Тој истакна дека Општина Центар континуирано вложува во градинките и училиштата, проширување на капацитетите и подобрување на условите.

„Ја изградивме најсовремената градинка во државата „Пролет“, а во нашата програма предвидена е изградба и на уште една нова градинка кај Клиничкиот центар“, истакна Герасимовски.

Поддршка и мотивација

Оваа година Општина Центар ја зголеми вредноста на наградите за 30 проценти, од 30.000 на 45.000 денари, со цел дополнително да ги мотивира и вреднува кадрите кои секојдневно вложуваат труд, грижа и посветеност во развојот и воспитувањето на децата, соопштија од општината.