„Stellantis“ започнува нова стратегија за развој на достапни електрични автомобили за Европа, а инспирацијата ја пронаоѓа во легендарни модели како „Citroen 2CV“ и „Fiat Panda“.
Новата иницијатива, наречена „E-Car“, предвидува производство на мали градски EV модели од 2028 година.
Автомобилите ќе се произведуваат во фабриката Помилјано во Италија, каде со години се произведуваа достапните модели на „Fiat“.
Целта на проектот е развој на едноставни и поевтини електрични возила наменети за градско возење и за купувачи на кои новите автомобили им станале прескапи.
Во меѓувреме, Европската унија подготвува нова M1E категорија за мали електрични автомобили пократки од 4,2 метри, што дополнително би можело да им го олесни развојот на ваквите возила на производителите.
Според достапните информации, „Fiat“ работи на помала и поевтина верзија на моделот „Fiat Grande Panda“, инспирирана од оригиналната „Panda“ од осумдесеттите години.
Во исто време, „Citroen“ наводно развива едноставен електричен модел што ќе го оживее духот на легендарниот модел „2CV“ („Спачек“).
Со овој проект, „Stellantis“ сака да понуди едноставни градски автомобили по пониски цени и на тој начин да одговори на растечките трошоци за нови возила во Европа.
