Кршејќи ги строгите протоколи, Кејт подготвено позирала за „селфиња“ и разговарала со ученици и тоа на италијански јазик.

Посетата на градот Реџо Емилија означува важно поглавје за 44-годишната Кејт Мидлтон. Ова е нејзино прво работно патување надвор од границите на Велика Британија откако на почетокот на минатата година објави дека нејзината болест е во ремисија.

Блескајќи во елегантен син костум на дизајнерката Еделин Ли, принцезата пристигнала на главниот градски плоштад во одлично расположение, фокусирана исклучиво на својата голема мисија — унапредување на раниот детски развој.

„Селфиња“ со граѓаните и познавање на јазикот

Илјадници воодушевени Италијанци со часови чекале пред градското собрание за во живо да ја видат идната кралица. Наместо формално да мавта од далечина, Кејт се одлучила за многу личен пристап. Се пробивала низ толпата, ги прегрнувала граѓаните, а со некои направила и „селфиња“.

Најмногу симпатии собрала кога клекнала пред група собрани ученици за опуштено да поразговара со нив, изненадувајќи ги сите присутни со своето познавање на италијанскиот јазик. Фотографиите од тој момент веднаш се појавија и на официјалниот Инстаграм-профил на принцот и принцезата од Велс, со соодветен двојазичен опис.

Зошто токму Реџо Емилија?

Во градското собрание ја пречекале градоначалникот Марко Масари и локалните челници, кои ѝ го врачиле „Primo Tricolore“, највисокото градско признание, за нејзината долгогодишна работа во областа на раниот детски развој. Градот Реџо Емилија не е избран случајно; тоа е место со меѓународно познат, иновативен филозофски и образовен пристап кон воспитувањето во првите години од животот на детето.

Соработниците на принцезата истакнуваат дека нејзината цел е детално да го проучи овој модел за да примени нови сознанија во својата понатамошна работа.

„Полна е со енергија, ентузијастична и возбудена. Таа црпи голема радост од оваа работа“, изјавил извор од палатата.