Француските десничари удрија по Мбапе: „Си отиде од ПСЖ за да освои Лига на шампиони, ама...“

Судирот меѓу француската крајна десница и најголемата фудбалска ѕвезда на Франција повторно ескалираше.

Само еден ден откако Килијан Мбапе во интервју за „Vanity Fair“ ја бранеше својата одлука да се вклучи во политичките дебати во Франција, лидерите на крајнодесничарското „Национално обединување“, Бардела и Ле Пен, ги искористија социјалните мрежи за да го нападнат капитенот на „триколорите“.

Ле Пен и Бардела, кои важат за главни фаворити на претседателските избори следната година, брзо ја потсетија јавноста дека „Пари Сен Жермен“ ја освоил Лигата на шампионите за првпат во историјата токму една година по бурното заминување на Мбапе од клубот во 2024 година — и дека сега има можност повторно да го освои трофејот по пласманот во овогодишното финале.

„Знам што се случува кога Килијан Мбапе ќе го напушти „ПСЖ“: клубот ја освојува Лигата на шампионите! (А можеби наскоро и по вторпат)“, напиша Бардела на мрежата „X“.

„Го напушти „ПСЖ“ за да ја освои Лигата на шампионите со „Реал Мадрид“. Во меѓувреме, „ПСЖ“ ја освои“, изјави Марин Ле Пен во интервју за францускиот „RTL“.

Партијата „Национално обединување“ со години има контроверзен однос со француската репрезентација.

Лидерите на крајната десница претходно предизвикуваа бројни реакции со критиките за расниот состав на националниот тим, сугерирајќи дека одредени играчи не се доволно „француски“.

Уште во 1996 година, основачот на партијата Жан-Мари Ле Пен изјави дека е „вештачки да се носат играчи од странство и да се нарекуваат француска репрезентација“.

Сегашниот клуб на Мбапе, шпанскиот гигант „Реал Мадрид“, доминираше во Лигата на шампионите во поголемиот дел од претходната деценија, но од доаѓањето на францускиот напаѓач имаше две сезони под очекувањата.

Поради тоа, дополнителниот притисок е насочен кон 27-годишниот фудбалер пред овогодишното Светско првенство кое ќе се одржи во САД, Канада и Мексико, каде Франција важи за еден од главните фаворити.

Во интервјуто за „Vanity Fair“, Мбапе ги бранеше своите претходни изјави во кои ги повикуваше граѓаните да „гласаат против екстремистите кои сакаат да ја поделат земјата“ за време на вонредните избори во 2024 година.

Тогаш и ѕвездата на „ПСЖ“, Усман Дембеле, ги повика гласачите да се мобилизираат против „Националното обединување“, оценувајќи ги резултатите на таа партија како „алармантни“.

Сличен став изнесе и Маркус Тирам, кој порача дека против таа политичка опција мора да се води борба.

„Ние сме граѓани и не можевме само да седиме и да си велиме дека сè ќе биде во ред додека излегуваме на терен. Се обидуваме да се бориме против идејата дека фудбалерот треба само да молчи и да игра“, изјави Мбапе, алудирајќи на познатата изјава на американската конзервативна коментаторка Лора Инграм упатена кон НБА ѕвездата Леброн Џејмс.

„Знам што значи кога такви луѓе ќе дојдат на власт и какви последици тоа може да има за оваа земја“, додаде францускиот репрезентативец.

Голем број играчи од сегашната репрезентација на Франција потекнуваат од поранешни африкански колонии или и самите се родени надвор од Франција.

Таткото на Мбапе е роден во Камерун, додека неговата мајка има алжирско потекло.

Сепак, бидејќи Ле Пен последниве години се обидува својата партија да ја претстави како поумерена и поприфатлива за пошироката јавност, таа и нејзините соработници главно избегнуваат директни напади врз француската репрезентација, особено поради големите успеси на „триколорите“ во последната деценија — вклучувајќи ја титулата светски шампион во 2018 година и финалето во 2022 година.

Интересно е што Бардела уште во 2022 година го нарече Мбапе „пример за успешна асимилација“.