Првите деветорки во светот го прославиле својот петти роденден, а снимката од ова весело семејство од Мали ја сподели официјалната страница на Гинисовата книга на рекорди на социјалната мрежа Икс.
Халима Сисе и Абделкадер Арби во специјализиран центар во Мароко, на 4 мај 2021 година, добиле четири момчиња – Мохамед VI, Елхаџи, Оумар и Бах – и пет девојчиња – Кадидиу, Фатума, Хава, Адама и Оуму.
Родителите за Гинисовата книга на рекорди откриле дека нивните деца сега подготвено чекорат кон училишните обврски, возбудени поради почетокот на ново поглавје во својот живот. Халима и Абделкадер истакнале колку се благодарни за здравјето на своите малечки и за сè што постигнале во изминатите пет години.
Фотографиите од прославата ги прикажуваат децата во шарени модни комбинации, весело опкружени со пријатели и членови на семејството. Парот изразил благодарност за поддршката што со години ја добивале од заедницата и од членовите на семејството.
„Нашите деца сега среќно пораснаа, а нивните личности се јасно изразени. Секое е уникатно и посебно на свој начин“, рекла Халима, додавајќи дека одгледувањето девет деца е предизвик, но неверојатно исполнувачко искуство.
Семејството сега гледа кон иднината, со децата кои се подготвени да го започнат школувањето, а родителите се надеваат дека образованието ќе им помогне да продолжат да ги развиваат своите таленти и личности.
Освен деветорките, парот има и постара ќерка, Суда, која сега има седум години.
На почетокот лекарите верувале дека Халима носи седум бебиња, но откако таа и Абделкадер биле префрлени во Мароко на лекување во специјалистичка клиника, откриле дека всушност била бремена со девет деца.
Петте девојчиња и четирите момчиња се родиле предвреме со царски рез, во 30-тата гестациска недела. Нормалната бременост трае околу 40 недели. Секое од нив тежело меѓу 0,5 и 1 килограм.
