Спин-оф на популарната серија „The Big Bang Theory“, под наслов „Stuart Fails to Save the Universe“ („Стјуарт не успева да го спаси универзумот“), ќе биде достапен за стриминг на „HBO Max“ од јули оваа година.
Во серијата глумат Кевин Сасман, Лорен Лапкус, Брајан Посен и Џон Рос Бови, а веста беше објавена во неделата за време на панелот „Stuart Fails to Save the Universe“ на настанот „CCXP Mexico City“.
За време на панелот беше откриено и дека оригиналната музичка тема за серијата ќе ја работи добитникот на наградите Еми и Греми, Дени Елфман, најпознат по работата на филмовите „The Nightmare Before Christmas“ и „Corpse Bride“.
Според описот на оваа научнофантастична серија, сопственикот на книжарница за стрипови Стјуарт Блум е задолжен за враќање на реалноста откако ќе скрши уред што го изработиле Шелдон и Ленард, случајно предизвикувајќи мултиверзален Армагедон.
На Стјуарт во таа потрага му помагаат неговата девојка Денис, пријателот геолог Берт и квантниот физичар Бери Крипки. Патем се среќаваат со верзии на ликови од алтернативен универзум што ги запознавме и ги засакавме од „The Big Bang Theory“. Како што насловот имплицира, работите не одат онака како што очекувале.
Серијата првично беше најавена како проект во април 2023 година, а заеднички ја креираа Чак Лори, Зак Пен и Бил Пради.
Продукцијата ја потпишува „Chuck Lorre Productions“ во соработка со „Warner Bros. Television“, каде Лори има работен договор, додека Лори, Пен и Пради воедно се и извршни продуценти.
„Stuart Fails to Save the Universe“ е четвртиот проект од „The Big Bang Theory“. Освен оригиналната серија, која имаше 12 високо оценети сезони на „CBS“, приквелот „Young Sheldon“ го заврши емитувањето по седум сезони во мај 2024 година.
Спин-офот на таа серија „Georgie and Mandy's First Marriage“, со Монтана Џордан и Емили Осмент во главните улоги, премиерно беше прикажан на „CBS“ во октомври 2024 година.
