Настанот, одржан во сабота, на крајот бил прекинат откако напаѓач отворил оган.

Договорен трик зад сцената

Перлман во разговор со Џонатан Карл од ABC објаснил како дошло до трикот. „Каролин Левит, портпаролка на Белата куќа, ми рече: ‘Те предизвикувам. Следната недела треба да родам.’ Разговаравме за тоа бидејќи и двајцата имаме деца, а потоа таа праша: ‘Можеш ли да погодиш како ќе ја наречам ќерка ми?’ Тоа се случуваше зад сцената. Нè прекинаа бидејќи доаѓаше претседателот, па реков: ‘Да го зачуваме тоа за момент кога ќе излеземе на сцена’“, раскажал менталистот.

Подоцна излегол на сцената за да ги поздрави Трамп и неговата сопруга, а потоа почнал да изведува трик наменет за Левит.

Погодување на името во вирален момент

„Пријдов да ги поздравам претседателот и првата дама и почнав да погодувам, буква по буква, колку букви има името на нероденото дете на Левит. Во моментот што се гледа на снимката, го запишав името и прашав: ‘Дали погодив?’ Се свртев и тогаш ја гледате првата дама како вели: ‘Ох! Дали е тоа тоа име?’“, го опишал Перлман моментот снимен на видеото што се проширило на социјалните мрежи.

Додал дека Левит му дала дозвола да го открие името што го напишал на листот.

„Верувам дека името е Вивиан. Да, тоа го погодив“, рекол тој.

Што се случи?

Пукањето на „White House Correspondents’ Dinner“, гламурозен настан во Вашингтон кој често се нарекува и „матурска вечер за политичари и новинари“, во миг ја претворило вечерта на сатира, говори и црвен тепих во сцена на хаос и паника.

Според извештаи на американските медиуми, вооружен напаѓач се обидел да пробие безбедносен пункт во хотелот „Washington Hilton“ додека внатре се наоѓале Доналд Трамп, Меланија Трамп, Џ. Д. Венс, членови на администрацијата и стотици гости, по што се слушнале истрели, а гостите завршиле под маси додека обезбедувањето итно ги извело највисоките функционери на безбедно.

Напаѓачот, според AP, бил совладан пред да успее да влезе во главната сала, а меѓу околу 2300 гости немало потешко повредени, иако инцидентот веднаш ја прекинал вечерта која требало да ги слави медиумите и слободата на говорот.