Рускиот претседател Владимир Путин објави еднострано примирје за православниот Велигден, кое е предвидено да трае од 16 часот во сабота, 11 април, до крајот на недела, 12 април.
Според соопштението од Москва, во овој период, непријателствата ќе бидат прекинати на сите фронтови. Русија изјави дека очекува Украина да го стори истото и да прогласи прекин на огнот.
„Владимир Путин им наложи на министерот за одбрана Андреј Белоусов и началникот на Генералштабот Валериј Герасимов да ги прекинат воените операции во сите области на таканаречениот Северен воен округ за време на велигденските празници. Во пресрет на православниот празник Велигден (Воскресението Христово), се прогласува прекин на огнот од 16 часот на 11 април до крајот на денот на 12 април“, соопшти Кремљ.
Војниците добија инструкции да останат подготвени да одговорат на можни непријателски провокации, се додава во соопштението.
Зеленски го прифати прекинот на огнот.
„Украина постојано нагласуваше дека сме подготвени да преземеме возвратни чекори. Предложивме прекин на огнот за велигденските празници оваа година и ќе дејствуваме соодветно. На луѓето им е потребен Велигден без закани и вистински потег кон мир, а Русија има можност да не се врати на нападите по Велигден“, рече Зеленски.
Зеленски пред три дена ѝ понуди прекин на огнот на Русија
Зеленски пред три дена изјави дека го поддржува предлогот до Русија за прекин на огнот за Велигден под услов Москва да ги запре сите напади врз енергетската инфраструктура.
Зеленски рече дека предлогот ѝ бил доставен на Москва со посредство на САД. Тој исто така рече дека продолжува работата заедно со американските преговарачи за безбедносните гаранции, кои ги нарече клуч за траен мир.
„Доколку Русија е подготвена да ги запре нападите врз нашата енергетска инфраструктура, ние ќе бидеме подготвени да одговориме со иста мера“, рече тој. „Овој предлог ѝ беше доставен на руската страна со посредство на Американците“.
