Американскиот претседател Доналд Трамп ја разреши досегашната министерка за внатрешна безбедност Кристи Ноем и на нејзино место го предложи републиканскиот сенатор Марквејн Малин.
Малин ја презема една од клучните институции на американската внатрешна политика, Министерството за внатрешна безбедност, кое воедно е и најфинансираната сојузна агенција за спроведување на законот и централен столб на политиката на Трамп кон имиграцијата.
За разлика од класичните политички кариери, патот на Малин до Вашингтон бил исклучително необичен. Како што пишува Си-ен-ен, роден е во Тулса, а пораснал во малиот град Вествил, каде што рано го презел семејниот водоинсталатерски бизнис откако татко му се разболел. Подоцна, меѓу другото, се занимавал и со сточарство. Според неговата официјална биографија, Малин бил и професионален борец во мешани боречки вештини (ММА), со скор од 5-0. Тој „борбен“ имиџ очигледно го пренел и во политиката.
Во политиката влегол во 2013 година како пратеник во Претставничкиот дом, каде што останал десет години, а во 2023 година станал сенатор откако го наследи долгогодишниот републикански сенатор Џим Инхоф. Марквејн Малин е припадник на племето Чероки, што ја прави неговата политичка приказна дополнително специфична.
Малин се профилирал како силен застапник на политиката на Трамп, особено во областа на имиграцијата. Според медиумските извештаи, неговите претходни изјави јасно покажуваат дека поддржува рестриктивен пристап.
На пример, во интервју за Ен-би-си изјавил дека децата родени во САД од родители без документи треба да бидат депортирани заедно со родителите, нагласувајќи дека „нема причина да се разделува семејството“. Исто така, тврдел дека постои „индустрија“ што го злоупотребува системот на државјанство по раѓање. Дополнително, Малин ги бранел постапките на сојузните имиграциски агенти во случаи на смртоносни престрелки во Минеаполис, тврдејќи дека дејствувале во самоодбрана. Како што наведува Си-ен-ен, отишол и чекор понатаму, сугерирајќи дека сите граѓани треба да носат доказ за државјанство.
Малин не е познат само по своите политички ставови, туку и по својот темперамент. Неговиот „борбен“ стил често предизвикувал контроверзии. Еден од најпознатите инциденти се случил во 2023 година за време на сослушување во Сенатот, кога го предизвикал претседателот на синдикатот Тимстерс, Шон О’Брајан, на физичка пресметка. Како што пренесува Си-ен-ен, ситуацијата ескалирала до таа мера што колегите морале физички да го запрат.
Исто така, тој предизвика критики кога сугерирал дека новинарите би пишувале „помалку лажни вести“ ако постоела можност за физичка пресметка. Според Ен-би-си њуз, токму таквите испади биле причина за загриженост кај некои сенатори. Републиканскиот сенатор Ренд Пол дури го довел во прашање тоа дали Малин има „проблеми со контрола на гневот“ и дали може да води толку важна институција.
И покрај контроверзиите, Малин беше потврден за министер со релативно тесен резултат од 54-45, со поддршка од двајца демократски сенатори. Но, како што истакнува Ен-би-си њуз, неговата потврда не значи и решавање на политичката криза. Министерството за внатрешна безбедност во моментов е во застој бидејќи демократите одбиваат да го поддржат финансирањето без построги ограничувања за имиграциските служби. Тоа вклучува барања за поголема транспарентност на агентите и судски налози за рации. Поради тоа, Малин ја презема функцијата во исклучително тешки околности – илјадници вработени работат без плата, а безбедносните линии на аеродромите стануваат сè подолги.
Самиот Малин својата нова улога ја опишал како „понизна чест“. Како што пренесува Си-ен-ен, тој нагласил дека е неверојатно што „момче од Вествил во Оклахома“ станува член на претседателскиот кабинет. Истовремено, изразил поддршка за својата претходничка Ноем, но и најавил дека гледа простор за подобрувања во работата на министерството. Трамп, од друга страна, во Малин гледа клучен човек за продолжување на својата политика. Во објава нагласил дека Малин „ќе ги обезбеди границите, ќе го запре криминалот и повторно ќе ја направи Америка безбедна“.
