Иранскиот режим погуби шведски државјанин под обвинение за шпионажа, потврди шведската министерка за надворешни работи во соопштение.
„Веруваме дека законската постапка што доведе до погубување на шведскиот државјанин не беше правно оправдана“, рече шведската министерка за надворешни работи Марија Малмер Стенергард. „Шведска ќе продолжи да ги осудува тешките кршења на човековите права во Иран“, додаде таа.
Шведските власти не го открија идентитетот на погубеното лице, но иранските државни медиуми велат дека станува збор за Курош Кејвани. Тој беше уапсен минатата година и обвинет за „разузнавачка соработка и шпионажа за израелската влада“.
„Од неговото апсење во јуни 2025 година, Шведска разговараше со ирански претставници во неколку наврати и на различни нивоа за овој случај. Во овие контакти, нагласивме дека очекуваме нашиот граѓанин да добие фер судење и да не биде осуден на смрт“, рече министерот Стенергард во соопштението.
Кејвани имаше двојно шведско и иранско државјанство. Тој е третото лице егзекутирано од Иран за шпионажа оваа година. Според норвешката организација „Иран хуман рајтс“, најмалку 13 лица беа егзекутирани минатата година по слични обвиненија.
Стотици луѓе сè уште чекаат егзекуција во Иран, вклучувајќи голем број од оние кои се сметаат за политички затвореници. Многумина сè уште не се осудени и се соочуваат со најстрогата казна.ж
„Смртната казна е нехумана, сурова и неповратна казна. Шведска, заедно со остатокот од ЕУ, ја осудува нејзината примена во сите околности“, заклучи шведската министерка.
