Голем број напуштени животни на улиците на Дубаи: Странците ги оставаат домашните миленици во засолништа

Според британскиот весник, ветеринарите деновиве добиваат сè повеќе пораки за напуштени животни, додека е забележано и зголемување на барањата за евтаназија.

Многу сопственици сакаат да го напуштат градот што е можно побрзо и не сакаат да ги сносат трошоците или да поминат низ административните процедури потребни за преместување на своите домашни миленици во друга земја.

Организацијата за заштита на животните „K9 Friends Dubai“ соопшти дека секојдневно добива голем број барања од сопственици кои сакаат да ги остават своите кучиња во засолниште за да можат да ги напуштат Обединетите Арапски Емирати.

Истовремено, пристигнуваат бројни повици за напуштени кученца и мачки. Волонтерите предупредуваат дека засолништата се веќе полни и немаат капацитет да примат нови животни.

Дополнителен проблем е фактот што во Дубаи строго се регулирани кампањите за собирање донации и кампањи за финансирање, додека платформите за групно финансирање како што е „GoFundMe“ не се дозволени.

Волонтерката Клер Хопкинс, која работи со неколку организации за заштита на животните, рекла дека многу сопственици се во паника.

Поради намалениот број летови, многу авиокомпании во моментов не превезуваат животни, а дури и кога е можен транспорт, потребни се дополнителни процедури како што е вакцинација против беснило, што може да го одложи патувањето за неколку недели.

Слична ситуација опишала и Ансо Стандер, Јужноафриканка која го води засолништето за животни „Шест кучиња“ во Ал Аин, ОАЕ. Таа истакнала дека секој ден добива десетици пораки од луѓе кои бараат сместување за напуштени кучиња и мачки.

„За само еден ден добив 27 пораки. Луѓето ја напуштаат земјата и многу учтиво и дискретно нѝ кажуваат дека ако не можеме да ги прифатиме, ќе ги напуштат. Зборуваме за луѓе со 20 мачки кои се обидуваат да ја напуштат земјата“, рекла таа.

Во еден случај, како што објаснила транспортер со четири мачиња и мачка бил оставен пред нејзиниот азил, со порака од сопственикот дека мора итно да се врати во својата земја поради ситуацијата во регионот.

Стандер, исто така рекла дека две кучиња биле застрелани во пустината помеѓу ОАЕ и Оман.

„Во вакви времиња, животните страдаат во тишина. Некои може да бидат оставени во хаос. Но, не можеме сами да го направиме тоа, нѝ требаат спонзори за изградба на надворешни засолништа за мачки и кучиња, како и трошоци за персонал, храна и ветеринари“, нагласила таа.

Активистите предупредуваат дека во време на криза, животните често остануваат „тивки жртви“ на конфликтите и апелираат за помош од донатори за да можат да обезбедат дополнителни објекти, храна и ветеринарна грижа за растечкиот број на напуштени домашни миленици.