Судот го одобри барањето на Арон Фајперс за привремено издржување од неговата сопруга Дениз Ричардс, со која е во постапка на развод. На актерката ѝ е наложено месечно да му исплаќа 5.000 долари, како и еднократна уплата од 30.000 долари за покривање на трошоците за адвокат во бракоразводната парница.
На рочиштето одржано во четвртокот, судијката Никол Бершон појасни дека износот од 30.000 долари се однесува исклучиво на трошоците за разводот, а не на одбраната на Фајперс во одвоената кривична постапка. Таа уплата ќе биде исплатена во три рати, при што првата рата од 10.000 долари ќе биде на крајот на март.
Судијката исто така ја појасни распределбата на месечните 5.000 долари: 2.000 долари за кирија, 1.000 за автомобил, 1.000 за храна, додека остатокот ги покрива другите трошоци. Фајперс, кој на судот навел дека на сметката има само 200 долари, изјави дека таа сума сепак му помага.
По одлуката на судот, Дениз Ричардс изјави дека не може да си ја дозволи таа сума. Актерката рече дека „едвај го плаќа сопствениот адвокат“ и дека за време на бракот со Фајперс, кој траел од 2018 до 2025 година, „трошела сè што заработила“. Додаде дека ништо не вложувала, а нејзиниот адвокат Марк Грос нагласи исклучително високи трошоци за старателство за нивната 14-годишна ќерка Елоиз, која има ретко хромозомско нарушување и забавен развој.
Грос исто така истакна дека „жртвите на злоупотреба не треба да бидат должни да го издржуваат својот насилник“, алудирајќи на трајната забрана за приближување што Ричардс ја издејствува против Фајперс во ноември 2025 година.
Во меѓувреме, 53-годишниот Фајперс се соочува со четири обвиненија – две за нанесување телесни повреди на брачен другар и две за попречување сведок со закана или насилство – кои тој ги негира. Неговиот адвокат на рочиштето напомена дека Фајперс сè уште не е осуден за ниту едно од тие дела.
Поранешните сопружници се разделија минатото лето, а Ричардс во јануари на „Инстаграм“ ја опиша болната година исполнета со отпуштања и откривање на вистината.
„Колку и да беше болно, толку сум благодарна за јасноста“, напиша тогаш.
