Жена која исчезна пред 24 години, а беше пронајдена додека водела нов живот, е уапсена поради децениско обвинение за возење во алкохолизирана состојба.
Мишел Хандли Смит имала 38 години кога на 9 декември 2001 година го напуштила својот дом во Иден, Северна Каролина, за да купи божиќни подароци во Мартинсвил, Вирџинија.
Никогаш не се вратила, но минатата недела беше пронајдена жива и здрава во Северна Каролина, на адреса за која од полицијата побарала да не ѝ ја откриваат на никого, па дури ни на нејзиното загрижено семејство.
Сепак, во средата вечерта беше уапсена поради обвинение за возење под дејство на алкохол од 11 ноември 2001 година, кое било активно од моментот на нејзиното исчезнување четири недели подоцна, според судските записи од округот Рокингем, кои прв ги објави "Daily Mail".
Таа не се појавила на судското рочиште закажано за 27 декември 2001 година, туку исчезнала, оставајќи ги своите деца, тогаш на возраст од 19, 14 и седум години, без мајка.
Налог за апсење бил издаден поради нејзиното непојавување на суд и останал на сила сè додека полицијата конечно не ја пронашла.
Полициски службеници од округот Робсон ја уапсиле Смит, која сега има 62 години, на адреса во Сент Полс, Северна Каролина, речиси три часа оддалечена од домот во Стоунвил од каде што исчезнала.
Таа била изведена пред судијата од округот Робсон, Макан Синг, и добила кауција со услов да се појави на рочиште на 26 март во округот Рокингем, соопшти полицијата.
Мајката на три деца била пуштена од затворот во округот Робсон во четврток наутро со кауција од 2.000 долари, според судските записи до кои дошол "Daily Mail".
На фотографијата од притвор што ја објави "Daily Mail", Смит изгледа целосно поинаку во однос на последните фотографии од плакатите за исчезнати лица. Нејзината порано темна коса сега е седа и врзана.
Смит нема да се соочи со обвиненија поврзани со нејзиното исчезнување, изјави Кејти Грег, обвинителка на окрузите Касвел и Рокингем, за "Daily Mail".
Таа додаде дека се сретнала со детективите во вторник и дека, врз основа на нивната истрага, одлучиле да не поднесуваат обвинение.
„Ја поддржувам нивната одлука“, изјави Грег.
Откако Смит минатата недела беше пронајдена жива, нејзината роднина Барбара Бирд изрази целосно изненадување.
„Малку ми доаѓа да излезам надвор и да викам: ’Жива е, жива е!‘“, изјави Бирд за „"WFMYNews 2"“.
„Со години не знаевме дали да тагуваме или да чекаме … Моето најголемо прашање за неа е: ’Што се случи тој декември пред толку години? Што те натера да заминеш? Што се случи?‘“
„Разбирам и почитувам што не сака никој од нас да стапи во контакт со неа“, додаде таа.
„Не сум лута … Најважниот одговор што го добив денес е дека е жива. Ништо друго во овој момент не е важно.“
На „Facebook“, ќерката на Смит, Аманда, напиша долга објава по повод веста дека нејзината мајка е пронајдена.
„Што се однесува до моите чувства кон мама … пресреќна сум, бесна сум, скршена сум, целосно измешано! Дали некогаш повторно ќе имам однос со мајка ми? Искрено, не можам да одговорам затоа што ни самата не знам. Мојата прва реакција би била да, апсолутно, но потоа помислувам на сета болка … Сепак, и тогаш, мама е само човек, како и сите ние“, напиша таа.
🚔Michelle Hundley Smith who was at the center of a 24 year old missing person case has been served with Order for Arrest...
Posted by The Messenger of Madison-Mayodan on Thursday 26 February 2026
„Кога беше дел од моето секојдневие, ми покажа љубов и поврзаност што никогаш нема да се заборави. Секако дека имаше расправии мајка-ќерка, но сега се сеќавам само на насмевките што ги делевме, среќните моменти и љубовта што ја чувствував!“
„Мојот татко беше дел од моето секојдневие целиот живот и ми покажува љубов, имаме живот што никогаш нема да се заборави! Имаше и расправии татко-ќерка, но се сеќавам само на насмевките, љубовта и врската што ја делиме.“
Исчезнувањето на Смит со години го прогонувало нејзиното семејство, оставајќи многу прашања без одговор.
„Не знам што точно се случи. До ден-денес не сум сигурна дали сè уште си тука на Земјата или си почината“, напиша ќерката во 2024 година.
„Знам само дека остави празнина во срцата на луѓето! Плачам и тагувам за односот што повеќе никогаш нема да постои, плачам и тагувам за односот што никогаш не го имавме … и никогаш нема да дознаеме, нели?“
„Те сакам и ми недостасуваш секој ден. Лута сум поради болката, но најмногу сум лута што мојот брат и сестра мораа, односно мораат, да чувствуваат болка и страдање. Ако те пронајдев жива, ако дознаев дека едноставно си побегнала од сè … сигурна сум дека би те сакала исто како и порано“, додаде таа, наведувајќи дека и понатаму би била лута поради болката низ која поминале нејзините брат и сестра.
„Facebook“ страницата "Bring Michele Hundley Smith Home" наведе дека Смит во моментот на исчезнувањето управувала темнозелен „Pontiac Trans Sport“ од 1995 година, кој никогаш не бил пронајден.
„Мишел никогаш доброволно не би ги оставила своите деца. Очајнички бараме одговори и ја молиме заедницата за поддршка и помош во обидот да ја откриеме вистината за тоа што ѝ се случи на Мишел и зошто мистериозно исчезна и повеќе никогаш не беше видена“, се наведува на страницата.
„До денес, речиси 20 години подоцна, не е спроведена вистинска истрага за нејзиното исчезнување … Да се обидеме да ја завршиме оваа ноќна мора за најблиските на Мишел и да ја вратиме дома.“
Страницата ќе биде пренаменета за други случаи на исчезнати лица.
