На глобалните валутни пазари, американскиот долар ослабе во однос на кошничка валути минатата седмица, особено во однос на јапонскиот јен, бидејќи јапонските власти се заканија дека ќе интервенираат на пазарот во случај на прекумерни флуктуации на девизниот курс.

Индексот на доларот, кој ја покажува изведбата на американската во однос на шесте главни светски валути, минатата седмица падна за 0,8 отсто, на 96,88 поени. Истовремено доларот ослабе во однос на европската валута за 0,4 отсто, при што еврото достигна 1,1867 долари. Американската валута ослабе и во однос на јапонската, за 2,9 отсто, при што доларот падна на 152,70 јени.

Притисок врз јенот се очекуваше на почетокот од седмицата, бидејќи коалицијата на јапонската премиерка Санае Такаичи оствари убедлива победа на предвремените парламентарни избори минатат недела. Такаичи најави исклучително стимулативна фискална политика – зголемување на јавните трошоци и намалување на даноците – за поттикнување на економскиот раст.

Сепак, јенот не ослабе во однос на доларот. Напротив, го постигна својот најголем седмичен скок од февруари минатата година, бидејќи јапонските власти се заканија дека ќе интервенираат на пазарот во случај на прекумерни флуктуации на девизниот курс.

Благ пад на инфлацијата во САД

Инвеститорите беа фокусирани и на неколку важни извештаи од американската економија минатата седмица. Беше објавено дека бројот на вработените во САД се зголемил за 130.000 во јануари, значително повеќе отколку што очекуваа аналитичарите. Стапката на невработеност се намали од 4,4 на 4,3 отсто.

Подобрите од очекуваните податоци за пазарот на трудот ги ублажија стравувањата на инвеститорите од забавување на економскиот раст. Овие стравови беа предизвикани од слабите податоци за американската потрошувачка во декември.

Иако новите податоци за пазарот на трудот се добра вест за економскиот раст, тие се лоши вести за каматните стапки. Централната банка на САД неодамна ги следеше инфлацијата и податоците за пазарот на трудот најблиску при спроведување на монетарната политика.

Извештајот за потрошувачките цени, сепак, покажа дека инфлацијата малку падна во јануари на 2,4 отсто на годишна основа. Основната стапка на инфлација, која ги исклучува цените на храната и енергијата, беше 2,5 отсто.

Со оглед на тоа што пазарот на трудот е поотпорен отколку што претходно се сметаше, а инфлацијата е сè уште над целната вредност на Fed од околу 2 отсто, очекувањата за каматните стапки не се променија значително од овие извештаи и се проценува дека Fed нема да ги намали стапките пред јуни.