Состојбата на гумите на возилото има многу поголемо влијание врз безбедноста отколку што повеќето возачи мислат.
Шпанската организација за безбедност во сообраќајот „Fesival“ објави податоци кои јасно покажуваат колку неисправните или истрошени гуми се поврзани со сообраќајните незгоди – и колку од тоа може да се спречи со правилен избор и основно одржување.
Според податоците од 2024 година, во Шпанија се регистрирани 554 сообраќајни незгоди со загинати и повредени кои биле поврзани со проблеми со гумите – истрошени, неисправни или дупнати пневматици.
Во тие незгоди учествувале 668 возила, а настрадале вкупно 1.017 лица, вклучувајќи 39 загинати, 123 тешко повредени и 855 полесно повредени, според статистиката на државната управа за сообраќај („DGT“), пренесува „Revija HAK“.
Експертите истакнуваат дека гумите се темел на безбедноста, бидејќи системите како „ABS“ и „ESC“ можат ефикасно да функционираат само ако постои добро прилепување. Нискиот притисок, малата длабочина на шарата или несоодветната смеса на гумата значително ја намалуваат нивната ефикасност.
Редовната контрола на гумите – барем еднаш месечно и пред подолги патувања или лоши временски услови – се смета за една од најисплатливите безбедносни мерки во сообраќајот.
Податоците од техничките прегледи дополнително го потврдуваат проблемот. Шпанското здружение „AECA-ITV“ наведува дека околу 20 проценти од сериозните недостатоци откриени за време на прегледите во 2024 година биле поврзани со осовини, тркала, гуми и потпирање.
„DGT“ во повеќе наврати предупредуваше дека значителен дел од возниот парк во таа држава има гуми во лоша состојба или пневматици кои не се приспособени на условите на возење.
Возењето со недоволен притисок во гумите ја зголемува нивната деформација, загревање и абење, а директно влијае и на сопирањето и управливоста. Се продолжува сопирачкиот пат и расте ризикот од аквапланинг.
Иако системите „TPMS“ можат да предупредат на пад на притисокот, тие не ја заменуваат редовната рачна контрола.
Во зима проблемот станува уште поизразен. На температури под 7 степени Целзиусови, летните гуми имаат послабо прилепување дури и на сув коловоз, а ако притоа се со лош квалитет или истрошени, нивната сигурност нагло опаѓа, што дополнително ја намалува ефикасноста на електронските безбедносни системи.
Заклучокот на експертите е јасен: не е доволно само да се внимава на состојбата на гумите, туку и паметно да се избираат пневматиците.
Следењето независни тестови и изборот на најбезбедни модели во рамки на достапниот буџет може да има пресудно влијание врз безбедноста при секојдневното возење.
