Мачката Филу исчезнала во август 2025 година од одморалиште на автопат во близина на Жирона, Шпанија, но успеал да го најде патот до својот дом во Олонзак, Франција, кој е оддалечен 250 километри од местото каде што се изгубил.
Патрик и Евелин Сир се враќале дома во Олонзак во август 2025 година кога нивниот миленик излегол преку прозорецот на камперот.
Парот застанал да наточи гориво на одморалиштето во Шпанија, но наскоро сфатиле дека мачката ја нема.
Според францускиот весник „L'Indépendant“, Патрик и Евелин со денови го барале својот миленик и поднеле молби до шпанската полиција, но Филу не бил пронајден. Иако добивале пријави за слични животни во околината, тоа не било нивното маче и парот се плашел дека нивниот миленик е засекогаш изгубен.
Како што поминувале месеците, надежта да го најдат се намалувала. Сепак, на 9-ти јануари 2026 година, добиле телефонски повик кој им го промени животот – од жена по име Елен, која тврдела дека го нашла Филу.
Елен го пронашла исцрпеното и ослабено маче во Хомпс, село на периферијата на родниот град на семејството. Го однела кај локален ветеринар, каде што преку микрочип било утврдено дека навистина станува збор за миленикот на семејството Сир.
Отпорното маче успеало да помине 250 километри, преку неколку региони и државни граници, за да го најде патот назад до своето семејство.
Експертите истакнуваат дека мачките имаат високо развиено просторно паметење, користејќи визуелни ориентири, мириси и звуци за навигација.
