Хотелот сместен на стадионот на англискиот клуб Блекпул воведе парични казни во износ од 3000 евра доколку гостите за време на натпреварите го гледаат теренот низ прозорецот на своите соби, пишува весникот „Telegraph“.
Имено, хотелот на својата веб-страница наведува дека гостите кои престојуваат во луксузни соби со директен поглед кон теренот мора да ги навлечат завесите цели 90 минути пред почетокот на секој домашен натпревар и да ги држат затворени во текот на целиот меч.
Овие мерки се применуваат и покрај тоа што цените на собите на деновите кога се играат натпревари се зголемуваат, па гостите плаќаат и до 160 евра по ноќ за сместување во простории кои претходно биле користени како ВИП-ложи.
Новинар на „Telegraph“, кој неодамна престојувал во хотелот за време на натпреварот меѓу Блекпул и Брентфорд, не бил однапред информиран за обврската за затворање на завесите при пријавувањето во хотелот, нешто повеќе од еден час пред почетокот на натпреварот.
„Ние како хотел всушност не надгледуваме, но апсолутно мора да ги спуштите завесите. Наводно, може да бидете казнети со околу 3000 евра доколку ве фатат“, го предупредил рецепционерот.
Инаку, хотелот се повикува на Законот за спортски настани од 1985 година, кој забранува консумирање алкохол на места од кои може да се види теренот за време на натпревари во првите пет рангови на англискиот фудбал.
Хотелските соби со поглед кон теренот, каде што гостите теоретски би можеле да отвораат пијалаци, според тоа можат да го прекршат овој закон, што потенцијално може да резултира со казна од трет степен во износ од 1150 евра доколку се покрене постапка пред судот за прекршоци.
