„Сè оди според планот, како што е предвидено, и тоа нè прави многу среќни. Првото што ќе го кажам е дека изградивме погон за истражувачки институт. Првата болест за која ќе почнеме да ги произведуваме овие лекови е меланомот“, изјави тој за телевизијата „Русија 1“, пренесува „Интерфакс“.

Според неговите зборови, се спроведува низа постапки за да се идентификуваат настанатите мутации, по што се избира и произведува специфичен mRNA препарат – терапевтска вакцина, која потоа се применува кај пациентот.

Мурашко додаде дека се користат и имуностимулирачки лекови.

„Го тераме телото да се бори против туморот со зајакнување на неговата одбрана. Ова е пристап на мобилизација на внатрешните сили на организмот“, истакна тој.

Лекување и во Србија

Да потсетиме, Министерството за здравство на Русија издаде одобренија за клиничка употреба на mRNA вакцина за лекување на меланом и пептидна вакцина за малигни тумори.

Во средината на октомври, руските научници им ја претставија на српските експерти најновата mRNA вакцина против рак.

Станува збор за државен проект од национално значење, кој се реализира под директно покровителство на рускиот претседател Владимир Путин.

Министерот во Владата на Србија задолжен за меѓународна економска соработка и за прашањата поврзани со општествената позиција на црквата во земјата и странство, д-р Ненад Поповиќ, тогаш се сретна со делегација на Националниот истражувачки центар за епидемиологија и микробиологија „Н. Ф. Гамалеја“, Министерството за здравство на Русија и Рускиот фонд за директни инвестиции, предводена од академикот на Руската академија на науките, проф. д-р Александар Леонидович Гинцбург.

Целта на посетата на руската делегација во Србија беше разгледување на можностите за воспоставување соработка во областа на науката и медицината.

Во рамките на овој проект е формиран конзорциум составен од 17 водечки руски научноистражувачки институти и универзитети, кои заеднички работат на развој на нови терапии во областа на онкологијата, имунологијата и генетиката.

Министерот истакна дека желбата на Република Србија е оваа иновативна терапија да им биде достапна на онколошките пациенти во земјата, а доколку дојде до реализација на соработката, Србија би можела да стане првата земја, по Русија, во која оваа вакцина ќе им биде достапна на пациентите.