Едно од најпрепознатливите места на скопската електронска музика и кафуле со култен статус, „Излет кафе“, официјално ќе престане со работа на 1 јануари 2026 година.
Кафулето кое се наоѓа кај грчката амбасада во Центар, беше отворено на 31 мај 2009 година и речиси 17 години претставуваше платформа за настапи на етаблирани имиња, како и за воздигнување нови млади артисти, а речиси не постои диџеј или музичар од Македонија кој не настапил тука.
Меѓу странските имиња кои настапиле во „Излет“ се вбројуваат: Derrick May, Gary Martin, Ian Pooley, Soichi, Thomas Neuman, Spencer Parker, Love Foxy, Mark Broom, Abu Haqq, Radio Slave, Funk D’Void, Nino Shebelic, Detroit in Effect и многу други.
Излет кафе се отвори на 31.05.2009 год ,затворањето ќе се случи на 01.01.2026...Неполни 17 години Излет беше култно...
Posted by Izlet Kafe on Saturday, December 27, 2025
„Излет кафе“ беше во длабока конекција со култниот и легендарен ноќен клуб „СЕКТОР 909“, а речиси и да немаше артист што настапил во „СЕКТОР 909“, а да не поминал и низ „Излет“.
Веста за затворањето предизвика неверување кај скопјани, а многумина коментираат дека „Излет“ ќе им недостасува.
„Скопје изгуби култно кафуле, ние изгубивме место каде што растевме. 17 години звук, луѓе, спомени и ноќи што не се повторуваат. Ова не беше само кафуле, ова беше култура. Кафулето престанува да работи. Културата не. 17 години не се бришат со клуч. Една врата се затвора, ама трагата останува“, гласи една од објавите на Инстаграм.
