Додека просечните купувачи двапати размислуваат поради високите цени и каматни стапки, луксузниот сегмент се однесува како кризата воопшто да не постои. Студија покажува дека побарувачката за автомобили со цена од 100.000 долари и повеќе продолжува да расте.
Иако просечната цена на нов автомобил во САД изнесува околу 50.000 долари, анализата наведува дека пазарот за возила од 100.000 долари нагоре и понатаму стои исклучително стабилно. Според проценките, овој сегмент би требало да расте од околу 5 до 7 проценти годишно во текот на следната деценија.
Најголем раст се очекува кај „понискиот“ луксузен сегмент – автомобилите со цена од 100.000 до 170.000 долари – каде што продажбата би можела да расте од 6 до 8 проценти годишно сè до 2035 година. Поскапите категории, од 170.000 до 500.000 долари, како и автомобилите над 500.000 долари, се очекува да бележат побавен раст, од околу 3 до 5 проценти.
Интересно е што и во овој „богат“ сегмент се повторува трендот присутен кај обичните автомобили: половните возила би требало да растат побрзо од новите. Во студијата се наведува дека продажбата на половни луксузни автомобили може да расте околу 1,5 пати побрзо од продажбата на нови, бидејќи новите се исклучително скапи, а понудата на половни постојано се зголемува.
Важен фактор е и начинот на купување. Иако класичните салони и понатаму се најпопуларни, три четвртини од испитаниците изјавиле дека би биле подготвени следниот автомобил да го купат целосно онлајн. Во истражувањето се наведува и дека голем дел од потенцијалните купувачи на луксузни автомобили редовно следат содржини на интернет, дури и кога во моментот не планираат купување.
А што е најпосакувано? Во сите возрасни групи, најбараните брендови се „Porsche“ и „Ferrari“. Електричните луксузни автомобили засега не се главен хит: мал дел од испитаниците изјавиле дека веќе поседуваат луксузен или егзотичен електричен автомобил, но помладите купувачи многу почесто наведуваат дека токму такво возило би го избрале како следно.
Пазарот на луксуз често се движи по свои правила, независно од тоа што се случува со „нормалните“ автомобили. Додека мнозинството купувачи се обидуваат да обезбедат што помала месечна рата, овој сегмент купува според желба и впечаток – и токму затоа не забавува.
