Гувернерката на Народната банка на Србија, Јоргованка Табаковиќ, изјави дека Србија денес има 52,3 тони злато во вредност од речиси шест милијарди евра, што претставува повеќе од една петтина од вкупните девизни резерви на земјата.
Како што рече, Србија денес има повеќе злато од сите земји од поранешна Југославија заедно.
„Имаме повеќе отколку поголемиот дел од земјите во Централна Европа. Имаме повеќе по глава на жител отколку која било држава на Западен Балкан. Ова не беше трка во количини. Ова беше трка во одговорност. Нашиот пат до 50 тони не беше ниту нагол, ниту случаен, ниту импулсивен. Тој е резултат на доследна стратегија која се темелеше на три столба: на долгорочна визија, на паметна комбинација од домашни и меѓународни купувања и на прецизно темпирање на влезовите во глобалните текови“, нагласи Табаковиќ.
Таа напомена дека овој значаен собир се одржува во година што ќе остане запишана како една од најважните во историјата на современиот пазар на злато.
„Се собравме во година во која овој благороден метал ја зголеми својата вредност за повеќе од половина од претходната година и повеќепати ги рушеше историските рекорди; во која централните банки ја продолжија побарувачката по три последователни години во кои купуваа над 1.000 тони; и во која златото, по повеќе децении, повторно стана не само симбол, туку и инструмент на монетарен суверенитет, отпорност и доверба“, рече Табаковиќ, соопшти НБС.
Како што истакна, говори во име на институција која на 10 јуни оваа година достигнала значајна пресвртница во својата модерна историја.
„Тој ден Србија за првпат го надмина нивото од 50 тони злато во своите девизни резерви. Ова не е само бројка или технички податок, туку резултат на визија, политичка одговорност и институционална доследност. Тоа е огледало на начинот на кој се гради доверба во државата — не декларативно, туку со конкретни и мерливи дела“, рече Табаковиќ.
Наведе дека кога ја презела функцијата гувернер на Народната банка на Србија во август 2012 година, количината на златни резерви изнесувала 14,8 тони, вредни околу 600 милиони евра.
„Учеството на златото во вкупните резерви тогаш беше под шест проценти. Денешните податоци покажуваат дека Србија денес количински има повеќе од три пати повеќе злато отколку што имаше на крајот на јули 2012 година, додека вредноста на златните резерви е зголемена десет пати. Истовремено, тоа е и потврда дека нашата економска политика се темели на долгорочна сигурност, а не на моментални импулси“, рече Табаковиќ.
Тридневниот собир, кој заеднички го организираат Светскиот совет за злато („World Gold Council“ – WGC) и Банката за меѓународни порамнувања („Bank for International Settlements“ – BIS), ги обединува највисоките претставници на централни банки, меѓународни финансиски институции и водечки експерти од глобалниот пазар на злато од повеќе од 40 земји во светот.
Извршниот форум претставува еден од најпрестижните светски собири посветени на улогата на златото во монетарните и финансиските системи и традиционално се одржува во рамките на меѓународните активности на двете институции.
Оваа година форумот е особено значаен и по тоа што гувернерката на Народната банка на Србија е единствениот гувернер на централна банка кој имал можност да се обрати пред учесниците — што претставува важно признание за Србија и резултат на развиената и успешна соработка со Банката за меѓународни порамнувања во областа на купување злато на меѓународниот пазар.
