Снимката од чилеанскиот претседател Габриел Борич, на која се гледа како пред да се сврти надесно прави кратка ротација околу својата оска, повторно привлече големо внимание од јавноста и медиумите во Латинска Америка.
Овој негов потег, кој е снимен во повеќе наврати, не претставува политичка порака ниту необична навика — станува збор за манифестација на опсесивно-компулсивно растројство (OCD), со кое Борич се бори од детството.
Борич за својата состојба зборуваше сосема отворено уште во 2018 година, истакнувајќи дека OCD му бил дијагностициран кога имал само 12 години. Како што тогаш објасни, растројството кај него се изразува преку низа ритуализирани постапки што е принуден да ги повторува, а една од нив е избегнување директно вртење надесно.
Иако ваквите движења понекогаш предизвикуваат изненадување или недоразбирање, Борич нагласува дека токму транспарентноста за менталното здравје може да ја намали стигмата која сè уште ги следи овие теми, особено кај политичките лидери.
Во интервју за магазинот „Time“, чилеанскиот претседател говореше за предрасудите со кои се соочуваат лицата со ментални потешкотии, особено оние на јавни функции.
„Мислам дека постои стигматизација на менталното здравје, каде што сè се поврзува со слабост. Никој нема да го критикува претседателот затоа што е дијабетичар, но ако има OCD, тоа е проблем. Тие митови мора да ги разбиеме. Големиот дел ментални заболувања денес можат успешно да се лекуваат, и затоа мора да ги дестигматизираме“, рече Борич.
Тој откри и дека претходно бил хоспитализиран поради потешки симптоми на OCD, а откако тоа јавно го споделил, многу граѓани му се јавиле, заблагодарувајќи му се за искреноста.
„Многу луѓе ми пишаа, со чувство на олеснување, велејќи: ‘Благодариме, се чувствувавме замолчено’“.
И покрај дијагнозата, Борич стана еден од најмладите претседатели во историјата на Чиле, откако претходно беше студентски лидер и пратеник. Неговиот пример, сметаат експертите, може да има важна улога во нормализирањето на разговорите за менталното здравје — и во политиката и во општеството.
