Швајцарската компанија „Гунвор“, која понуди да ја купи меѓународната имотна сопственост на рускиот нафтен гигант „Лукоил“, соопшти дека ја повлекува својата понуда откако Соединетите Американски Држави порачаа дека „никогаш“ нема да одобрат таков договор.
„Претседателот (Доналд) Трамп јасно кажа дека војната мора веднаш да заврши“, објави официјалниот профил на американското Министерство за финансии на мрежата „X“. „Сè додека (рускиот претседател Владимир) Путин продолжува со бесмислените убиства, кремљската марионета, „Гунвор“, никогаш нема да добие дозвола да работи и остварува профит“.
„Изјавата на Министерството за финансии е во суштина погрешна и неточна“, изјави портпаролот на „Гунвор“, Сет Пјетрас, за „Politico“. „Во меѓувреме, „Гунвор“ ја повлекува својата понуда“.
Овие остри изјави следеа по соопштението на „Лукоил“ од минатата недела, во кое компанијата наведе дека ја прифатила понудата на оваа мултинационална трговска куќа за купување на нејзиниот меѓународен бизнис, откако администрацијата на Трамп најави санкции против руската енергетска компанија. „Лукоил“ нагласи дека американското Министерство за финансии мора да го одобри договорот пред компанијата официјално да биде ставена на „црната листа“ на 21 ноември.
Во Европа, „Лукоил“ поседува две рафинерии — во Бугарија и во Романија — 45 проценти удел во една холандска фабрика за преработка на горива и околу 2.000 бензински пумпи.
„Гунвор“ е основана во 2000 година од шведскиот милијардер Торбјорн Торнквист и Генадиј Тимченко, еден од најблиските соработници на Путин. Компанијата некое време беше најголемиот извозник на руска нафта во светот.
Во 2014 година, само неколку дена пред САД да воведат санкции на поранешниот сопственик на „Гунвор“ поради руската анексија на Крим, Тимченко го продаде својот удел од 43,6 проценти во компанијата.
Оттогаш, „Гунвор“ настојува да се дистанцира од Русија.
„‘Гунвор’ отсекогаш бил отворен и транспарентен во однос на своето сопствеништво и деловни активности, и веќе повеќе од една деценија активно се дистанцира од трговијата со Русија — продавајќи ги своите руски активи и јавно осудувајќи ја војната во Украина“, изјави Пјетрас.
„Со задоволство ќе ја искористиме можноста да го разјасниме ова сериозно недоразбирање“.
Денес
