Секако, станува збор за легендарната Ана Винтур, долгогодишна главна уредничка на магазинот „Vogue“.

По речиси четири децении водство на американското издание на модната „Библија“, Винтур објави дека се повлекува од позицијата главна уредничка и дека повеќе нема да ја води секојдневната редакција на списанието.

Сепак, тоа не значи крај на нејзината кариера — 75-годишната модна икона останува на високи функции во издавачката куќа „Condé Nast“, каде и понатаму ќе има клучна улога во глобалната уредувачка насока на „Vogue“.

Модна кралица која го менуваше светот

Ана Винтур не само што го обликуваше начинот на облекување на Американците — нејзиното влијание се прошири и до Африка, Индија и остатокот од светот.

Уште од 1980-тите, таа одредуваше што значи елеганција, луксуз и авторитет во модата. Секако, нејзиниот подем не помина без контроверзии.

Долго време се шпекулираше дека ликот на немилосрдната шефица од филмот „The Devil Wears Prada“, во кој глумеше Мерил Стрип е инспириран токму од неа.

Иако Винтур тврди дека приказната е „чиста фикција“, биографијата на Ејми Одел од 2022 година откри дека модната уредничка навистина имала асистентка задолжена секое утро да ѝ носи врело „Starbucks“ лате и мафини со боровинки.

Без разлика на тоа колку филмот ја одразува реалноста, тој совршено го прикажува влијанието и ладнокрвната прецизност со која Винтур владееше со светот на модата речиси четири децении.

Од Лондон до Њујорк — подемот на модната легенда

Родена во Лондон во 1949 година, Ана потекнува од угледна фамилија. Нејзиниот татко, уредник на „London Evening Standard“, ѝ помогнал да ја започне кариерата на само 20 години како модна асистентка во магазинот „Harpers & Queen“.

Подоцна се преселила во Њујорк, каде напредувала низ бројни редакции, сè додека во 1988 не го презела американското издание на „Vogue“.

Во тоа време „Vogue“ се соочуваше со сериозна конкуренција од новиот женски магазин „Elle“, но благодарение на Винтур, „Vogue“ го пронајде својот стил и ја врати водечката позиција.

Таа прва почна да ги става познатите жени од политиката и Холивуд на насловните страници — меѓу нив беа Анџелина Џоли, Хилари Клинтон, а подоцна и мажи како Тимоти Шаламе.

Насловни страници кои ја менуваа историјата

Винтур е заслужна и за лансирањето на посебни изданија, меѓу кои е „Teen Vogue“ (1993), како и за поврзување на списанието со најексклузивниот настан во светот на модата — „Мет Гала“, кој таа го претвори во гламурозен спектакл полн со ѕвезди.

Под нејзиното раководство, „Vogue“ стана глобален бренд со повеќе од 28 меѓународни изданија.

Отворањето на „Vogue Africa“ во 2021 година ги стави африканските дизајнери во центарот на светското внимание, додека „Vogue India“, лансиран во 2007, придонесе за спојување на традиционалната индиска мода со современиот дизајн.

Критики за недостатокот на различност

Сепак, владеењето на Ана Винтур не помина без критики. „Vogue“ години наназад беше обвинуван за недостаток на различност и потценување на малцинските заедници.

Истражувањето на списанието „The Pudding“ покажа дека помеѓу 2000 и 2005 година, само три од 81 насловни страници ги краселе црни манекенки.

По убиството на Џорџ Флојд во 2020 година, Винтур го поддржа движењето „Black Lives Matter“, но многумина сметаат дека не сторила доволно.

Дури и насловната страница на „British Vogue“ од 2022 со девет африкански модели предизвика негодување бидејќи, според критиките, моделите биле прикажани преку западна естетика, со премногу обработени фотографии.

Обвинувања за работа за режимот на Асад

Со неа беа поврзани бројни контроверзии, а најголемата беше обвинувањето дека соработувала со режимот на Асад.

Американскиот „Vogue“ објави повеќе од контроверзен текст за сопругата на поранешниот сириски претседател Башар ал Асад. Во текстот за Асма ал Асад се пишувало во суперлатив.

Текстот брзо беше повлечен од интернет, но делови сè уште можат да се најдат, каде владеењето на Асад се опишува како „диво демократско“, а се истакнува дека неговото семејство живее во најбезбедната држава на Блискиот Исток. Асма ал Асад родена во Британија, е опишана како гламурозна, млада и многу шик прва дама — со харизма која носи големо освежување.

„Мет Гала“, скандали и (лажна) забрана за Доналд Трамп

Уште една бура настана кога се појави „deepfake“ видео во кое се чинеше дека Винтур зборува за „трајна забрана“ за Доналд Трамп на „Мет Гала“, со наводни зборови дека тој „никогаш не припаѓал на светот на модата“.

Видеото се покажа како лажно, но вистина е дека Винтур уште во 2017, во емисијата „The Late Late Show with James Corden“, призна дека поранешниот американски претседател е личност која таа никогаш повеќе не би ја поканила на овој престижен настан.