Микајла Ренфро од САД досега имала позитивни искуства со „Temu“, но нејзината последна нарачка завршила како целосно промашување.

Откако претходно успешно купила дрвен плакар, овојпат решила да си набави сет тави. На страницата пронашла прекрасен розов сет садови од десет парчиња, намален од 55 на само 31 фунта (околу 36 евра). Иако рецензиите и оцената од пет ѕвезди изгледале ветувачки, Микајла не ни претпоставувала зошто цената е толку ниска.

Фијаското го споделила со светот

Несреќното искуство го споделила на „TikTok“, каде покажала дека тавите, иако визуелно привлечни, биле екстремно лош квалитет. За да го докаже тоа, го замолила своето момче да се обиде да ги свитка со раце. Една по една, тавите се туткале и губеле облик со минимален напор.

Во видеото, кое стана вирално, Микајла низ смеа рекла:

„Официјално станав жртва на ’Temu‘“.

Подоцна објаснила:

„Ги купив за мојата камп-приколка, мислејќи дека не вреди да трошам 100 долари за тави и тенџериња за неа. Но, ова не е тоа“, изјавила разочарана.

Сепак, решила да им најде нова намена – сетот садови сега го користи како саксии за цвеќе во дворот.

Интернетот не престанува да коментира

Видеото на Микајла собрало повеќе од 22 милиони прегледи за само еден ден, над 1,7 милиони лајкови и илјадници коментари. Корисниците масовно ги споделиле своите размислувања за купувањето преку „Temu“.

„Купување садови од ’Temu‘ звучи како играње со животот“, напишал еден корисник.

„Купувајте квалитетни работи – долгорочно се поевтини и подобри за животната средина. Држете се подалеку од ’Temu‘, ’Shein‘ и ’Amazon‘“, додала друга личност.

Еден коментатор се пошегувал:

„Замислете да готвите, а тавата едноставно да се стопи на шпоретот.“

Заклучокот на повеќето бил јасен:

„Купувањето сериозни, вистински работи од ’Temu‘ е чиста лудост.“