Кирк (31) беше убиен на 10-ти септември за време на јавен говор во Јута, а истрагата сè уште е во тек.

Осудува насилство и покрај несогласувањата

Гостувајќи во поткастот „WTF“ на Марк Марон, Кертис го изразила своето мислење за трагедијата.

„Ќе споменам нешто само затоа што ми е на ум“, започнала актерката во епизодата објавена во неделата (56-та минута).

Притоа, таа основачот на организацијата „Turning Point USA“ го нарекла „Чарли Крист“, објаснувајќи дека тоа било лапсус поради неговото „длабоко, длабоко верување“ во религијата.

„Не се согласував со него речиси во ниту една точка која некогаш сум слушнала да ја изговори, но верувам дека беше човек од вера и се надевам дека во тој момент кога починал се чувствувал поврзан со својата вера“, продолжила Кертис. „Иако неговите идеи ми беа одвратни, тој сепак беше татко, сопруг и човек од вера. И се надевам дека почувствувал било каква врска со Бог“.

Предупредување за влијанието на насилните снимки

Борејќи се со солзите, 66-годишната актерка спомна дека на интернет кружи снимка од атентатот и дека познава луѓе кои ја гледале. „На 11-ти септември повторно ги гледавме тие слики од уривањето на зградите. Денес, како општество, сме бомбардирани со слики. Затоа не знаеме какви се долгорочните ефекти од постојаното гледање на уривањето на тие кули или повторното гледање на неговото погубување“, вели таа.

„Психолошки не знаеме доволно за тоа што тоа предизвикува. Што прави тоа? Такво нешто - никогаш не сакам да ја видам таа снимка од убиството“, додава познатата актерка.

Реакции на јавноста и истрага

Кертис не е единствената позната личност што зборуваше на оваа тема. Меѓу другите, се огласија и актерот Крис Прат, Арнолд Шварценегер и Џејк Пол, како и поранешните американски претседатели Барак Обама и Џо Бајден. „Во нашата земја нема место за вакво насилство. Тоа мора да престане сега“, порача Бајден.

Истражителите го уапсија и го именуваа 22-годишниот Тајлер Робинсон како осомничен за убиството на Кирк. Тој беше приведен помалку од 48 часа по трагедијата. Според заменик-директорот на ФБИ, Ден Бонгино, Робинсон покажувал „повеќе знаци на предупредување“ пред нападот, а агенцијата истражува дали настанот бил „дел од поширок напор“.