Дроновите со оптички влакна се најновата иновација во трката за вооружување меѓу Украина и Русија. Со помош на оптички кабел, тие се поврзани со оној што ги управува. Русите ги користеле за прв пат пред една година во Курската област, а сега таа технологија ја користи „Азов“ и другите украински бригади. Таа има цела низа предности во споредба со безжично контролираните беспилотни летала.

„Кога безжично контролирано беспилотно летало лета над рид или се обидува да слета таму, сигналот и контролата се губат. А овој дрон продолжува да пренесува снимки – без оглед на конфигурацијата на теренот“, објасни за ДВ еден од пилотите од бригадата „Азов“ со кодно име Лаплас.

Предности и недостатоци на беспилотните летала со оптички влакна

Движењето на безжично контролираните беспилотни летала може да биде попречено, а нивниот видеосигнал може да биде детектиран од непријателот. Беспилотните летала со оптички влакна се сметаат за побезбедни – барем засега. Сепак, тие имаат и слаба точка. Оптичкиот кабел е тежок за откривање и исклучително е издржлив – како најлонски рибарски конец. Но, ако се закачи некаде, да речеме на дрво, може да се скине и дронот ќе ја изгуби врската.

Украинскиот пилот вели дека овие беспилотни летала имаат уште еден недостаток: „Ако кабелот виси или се заплетка во гранки или трева и не е директно на земја, тој е многу забележлив на сончева светлина, особено во зори или самрак“. На тој начин, кабелот лесно може го открие оној што управува со беспилотното летало.

Ова, вели тој, се случило и претходно: додека украинска единица управувала со беспилотно летало од подрум, Русите го откриле засолништето и го нападнале – за среќа, без жртви.

Пилотите на беспилотни летала знаат дека тие сами по себе се драгоцени цели. Еден од нив, со кодно име Болд од бригадата „Хартија“, изјави за ДВ: „Постојат различни видови муниција – за тенкови и други. Исто така, постојат различни цилиндри со кабли – со различна должина, во зависност од целите што треба да се нападнат. Ако целта не е оддалечена повеќе од десет километри, се користат тие помали цилиндри со кабли“.

Подготовката за употреба на беспилотни летала со кабел трае подолго и бара поголем напор од оние кои се управуваат со радио контрола. Но, затоа нивната употреба овозможува поширок увид во бојното поле. „Кога почнавме да користиме дронови со оптички влакна, откривме дека многу блиску до нас има гнезда за митралези, магазини со муниција и мотоцикли, што не го очекувавме“, изјави за ДВ командантот на вод на бригадата „Хартија“, со кодно име Аристократ.

Дроновите со оптички влакна можат да влезат и во внатрешноста на зградите. „Тие летаат низ соби, ходници, меѓу канцеларии. Дури можете детално да видите што е нацртано на ѕидовите – а тоа е нешто што обичен дрон не може да го покаже“, објасни Болд.

„Нашата цел е да го уништиме непријателот“

Покрај тоа, беспилотните летала го држат непријателот настрана. „Кога ќе добиеме наредба, на пример: „Убијте војник на мотоцикл“, тогаш го вклучуваме беспилотното летало за да го елиминира непријателот“, вели командантот на баталјонот Арес од бригадата Хартија.

Тоа е нова руска тактика – војници на мотоцикли се обидуваат да ја пробијат украинската одбранбена линија. Малите, брзо движечки групи напаѓачи ги заменија големите оклопни напади. За да ги одвратат, Украинците користат камикази – беспилотни летала, но и потешки, за бомбардирање.

„Нашата цел е да го уништиме непријателот со сите расположливи средства. За да имаме тактичка предност, мора да бидеме еден чекор пред непријателот во развојот, да се потпираме на најновата технологија, брзо да воведуваме новини и да наоѓаме нови решенија“, вели Арес.

Беспилотните летала со оптички влакна се најновата иновација на фронтовската линија. И сигурно нема да бидат последна.