Полицијата уапси неименуван возач кој возел по познатиот аутобан со неверојатна брзина од 322 км/ч, дури 200 км/ч над дозволеното ограничување, соопштија властите.

Тој бил запрен за време на рутинска контрола на автопатот „A2“, во близина на местото Бург, западно од Берлин, на 28 јули.

Рекордна казна

Полицијата соопшти дека на возачот му е изречена парична казна од 900 евра, како и забрана за управување со возило во траење од три месеци. Дополнително, му биле одземени два бода од возачката дозвола.

Неговиот автомобил бил снимен со стационарен радар познат како „Enforcement Trailer“. На екранот на уредот била прикажана брзината, која полицијата ја опиша како „најголемата досега забележана“.

Германските автопатишта („Autobahn“) се познати ширум светот по делниците без ограничување на брзината, но тоа не важи за сите делови, пренесува „Daily Mail“.

Постојат ограничувања

Ограничувањата постојат на околу 30 отсто од патиштата, додека дополнителни девет отсто користат сообраќајни системи за регулирање на протокот. Некои делници имаат строги ограничувања, особено во области со поголем сообраќај или зголемен ризик од несреќи. Делот од патот каде што бил уапсен неименуваниот возач има ограничување од 120 км/ч.

Сојузната влада во 2019 година ги отфрли предлозите за воведување ограничувања на брзината на целата мрежа на автопатишта.