Со цел јавноста подобро да го разбере овој комплексен процес, "Volvo" објави видео кое детално прикажува како нивните "SUV" модели се прават сигурни – не само при судари, туку и при вооружени напади.

Како настанува непробојниот "Volvo"?

Процесот на трансформација започнува со готови возила што излегуваат од фабричката линија. "XC60" и "XC90" потоа целосно се расклопуваат и детално се скенираат, за да се изработат прецизно прилагодени оклопни делови.

Во внатрешноста се вградуваат зајакнувања од не’рѓосувачки челик со висока цврстина, особено околу шарките и рамките на вратите, додека покривот и кабината се обложуваат со панели од арамидни балистички влакна.

Сите стакла се заменуваат со повеќеслојни, непробојни материјали.

"Volvo" нагласува дека сите модификации се целосно усогласени со напредните системи за асистенција при возење, што значи дека оклопните верзии ги задржуваат функционалностите како адаптивен темпомат, систем за одржување во лента и автоматско сопирање при опасност.

Иако претходно соработуваше со германски партнер, денес не е познато дали "Volvo" го спроведува целиот процес самостојно.

Ја задржува удобноста и практичноста

Оклопните возила имаат сертификат за балистичка заштита "NIJ IIIA", призната во Северна и Јужна Америка, Европа и Велика Британија. Овој стандард гарантира отпорност на муниција од различни калибри.

Иако тоа не се споменува во видеото, "Volvo" претходно нудеше и повисоко ниво на заштита, вклучувајќи и отпорност на експлозивни направи.

И покрај значајните модификации, "Volvo" тврди дека оклопните возила ја задржуваат речиси целата практичност и удобност на стандардните модели.

Внатрешноста е идентична и нуди ист простор.

Единствените реални компромиси се неможноста за спуштање на задните прозорци и значително зголемената тежина на возилото.

Важно е да се истакне дека оклопните модели доаѓаат со иста фабричка гаранција како и стандардните верзии, а редовното сервисирање може да се изврши во секој овластен "Volvo" сервис.

Интересен факт е дека и "plug-in" хибридната верзија на моделот "XC90" може да се оклопи.

Со своите 455 коњски сили и 709 Nm вртежен момент, овој погонски систем лесно ја поднесува дополнителната тежина, а овозможува и целосно електрично возење. Стандардниот електричен опсег од околу 50 километри ќе биде нешто намален поради зголемената маса.

Цените не се објавуваат јавно, бидејќи зависат од специфичните барања на клиентот и избраното ниво на заштита.