Но, во ситуации кога има вооружен конфликт – како што е случајот меѓу Израел и Иран – опасностите од хакирање се драстично зголемени, а во некои случаи може да бидат прашање на живот или смрт. На таа опасност јавно предупреди Рафаел Франко, поранешен заменик-директор на израелската национална управа за сајбер-безбедност, а денес извршен директор на "Code Blue", компанија за сајбер-заштита.

Според Франко, последниве денови е забележано зголемено дејствување на ирански хакери кои се обидуваат да пробијат надзорни камери и други уреди на израелски граѓани, со цел прибирање на воено-разузнавачки податоци. Информациите добиени од ваквите камери можат да откријат точни локации на паднати проектили и да се искористат за зголемување на прецизноста при идни напади, објаснува Франко.

И сообраќајните камери исклучени

Од израелската Национална дирекција за сајбер-безбедност потврдуваат дека нападите врз безбедносни камери од страна на ирански хакери се интензивирале. Најмногу се таргетираат камери со слаби безбедносни поставки – односно оние со стандардни (default) лозинки или едноставни комбинации кои лесно се пробиваат, пренесува "Zimo.hr".

Откако ќе ја пробијат лозинката, хакерите добиваат пристап до камерата и можат во реално време да ги следат видеата. Освен информации за ударите на проектили, можат да го следат и движењето на војници и други критични податоци.

Слична тактика користел и Хамас во минатото. Нивни членови со години хакирале илјадници приватни и јавни камери низ Израел за да прибираат разузнавачки информации, пренесува "Techspot".