[ФОТО] Овој електричен "Cadillac" забрзува како "Ferrari"

"Cadillac" ги нуди своите врвни перформанси преку V-серијата – вклучувајќи ги и најновите електрични модели. "Lyriq" беше првиот електричен автомобил со ознаката V, а сега тоа име се проширува и на помалиот "Optiq".

"Cadillac Optiq-V" нуди значително повеќе сила од стандардниот модел: 519 коњски сили и 650 Nm вртежен момент, во споредба со 300 коњски сили и 480 Nm кај основната верзија.

За ова е заслужен погонски систем со два електромотора и унапредена батерија со капацитет од 85 kWh.

"Optiq-V" од 0 до 100 км/ч стигнува за само 3,5 секунди, што е речиси идентично со најмоќниот "Cadillac" од V-серијата, "CT5-V Blackwing" (3,4 секунди).

За споредба, поголемиот "Lyriq-V" е уште побрз – забрзува до стотка за 3,3 секунди. И покрај зголемената моќност, "Optiq-V" има солиден досег од 442 километри.

Можеби најважно од сè, ова е првиот модел на "General Motors" кој фабрички доаѓа со "North American Charging Standard" (NACS) приклучок.

Тоа значи дека може да се полни на илјадници "Tesla Supercharger" станици ширум светот – без потреба од адаптер. "GM" сè уште не открива детали за брзината на полнење.

Новиот "V-Mode" систем донесува "launch control" и "Competitive Mode", кој ја приспособува контролата на пролизгување за уште подобро управување.

Новите "Brembo" перформанс предни сопирачки му овозможуваат на "Optiq-V" поголема сила на запирање, а систем на "GM" за автономно возење "Super Cruise" е вклучен како стандардна опрема.

Моќта оди заедно со поагресивен изглед – "Optiq-V" има уникатна "V-Mesh" предна решетка, црни сјајни детали и опционални карбонски додатоци на задниот браник и спојлерот.

Тркалата се специјално дизајнирани – 21 инчи со графитна завршница и ласерски врежан "V-Series" амблем.

Купувачите можат да изберат полирани или обоени тркала, со гуми за сите сезони или опционални летни гуми.

"Cadillac" нуди две бои: мат сива "Magnus Metal Frost" и длабока сина "Deep Ocean" (како на фотографиите).

Сините детали се пренесуваат и на "Brembo" сопирачките, како и во внатрешноста – со акценти во "Santorini Blue" или "Sky Cool Gray" на таблата, вратите, седиштата, па дури и на сигурносните појаси.

Покрај "Super Cruise", "Optiq-V" вклучува и напредна технологија како "AKG Studio" аудио систем со 19 звучници, огромен 33-инчен екран што ги обединува инструмент таблата и мултимедијалниот дисплеј, како и "Google" инфотејнмент со "Google Maps" и "Google Assistant" апликации.

За жал, "Apple CarPlay" и "Android Auto" не се достапни.

Стандардниот "Cadillac Optiq" во САД чини од 56.390 долари, додека "V-Series" верзијата чини 68.795 долари со вклучени трошоци.

За споредба, поголемиот и побрз "Lyriq-V" започнува од 79.990 долари.