Ако автомобилот не го возите со недели и го оставите долго време паркиран, многу е веројатно дека порано или подоцна ќе се појават проблеми. Многу возачи најпрво помислуваат на акумулаторот, и тоа со причина, бидејќи тој се празни дури и кога возилото не се користи. По подолго мирување може да се случи автомобилот воопшто да не може да се стартува.

Сепак, акумулаторот не е единственото нешто на кое треба да се внимава. Долготрајното мирување може негативно да влијае и на други делови од возилото, па последиците понекогаш се посериозни отколку што изгледа на прв поглед.

Акумулаторот е прв на удар

Кога автомобилот не се вози со недели, акумулаторот постепено ја губи својата моќ. Ако возилото долго стои без да се стартува, може целосно да се испразни, па моторот повеќе нема да може да се вклучи.

Затоа, кај автомобилите што ретко се користат, токму акумулаторот е една од најчестите причини за проблеми по подолго некористење.

Син чад од ауспухот може да укажува на дефект

Доколку по подолго стоење забележите дека при забрзување и отпуштање на педалата за гас од ауспухот излегува синкаст чад, тоа може да биде знак за внатрешно истекување на масло.

Во тој случај маслото навлегува во цилиндрите, каде што согорува заедно со горивото. Ваквата појава не треба да се игнорира, бидејќи може да укажува на посериозен проблем во моторот.

Водената пумпа и системот за миење стакла можат да откажат

Долготрајното некористење не ѝ одговара ни на водената пумпа, која со текот на времето може да за’рѓа и да се заглави.

Освен тоа, во моторниот простор се наоѓаат и делови од системот за бришачи и пумпата за миење на ветробранското стакло. Моторот што ја придвижува пумпата може да оксидира, додека одредени делови од системот можат да се затнат поради нечистотии и наслаги.

Ако по подолго мирување забележите дека некоја електрична компонента не функционира, потребно е да се проверат и осигурувачите.

Сопирачките по мирување не се веднаш во полна функција

Дисковите на сопирачките за време на мирување можат да кородираат, поради што првите сопирања ќе бидат послаби од вообичаено. Потребно е одредено време за системот за сопирање повторно да се врати во нормална состојба и целосна функција.

Ако автомобилот го оставате паркиран подолг период, се препорачува да не ја повлекувате рачната сопирачка, бидејќи постои можност плочките и дисковите да се залепат.

Треба да се има предвид и дека течноста за сопирачки со текот на времето ги губи своите својства, особено ако возилото стои подолго од шест месеци.

Гумите можат да ја променат формата

Кога автомобилот долго стои на едно место, гумите можат да се деформираат. Тоа особено се забележува ако подоцна при возење почувствувате вибрации што претходно не постоеле.

Во таква ситуација најдобро е гумите да ги прегледа вулканизер или механичар, за да се утврди дали дошло до трајни промени.

Влага во кабината создава непријатен мирис

Ако во внатрешноста на автомобилот има влага, многу е веројатно дека по неколку недели ќе се појави непријатен мирис. Затворениот простор без проветрување дополнително го влошува проблемот.

Затоа, ако возилото го оставате во гаража, може да биде корисно прозорците да ги оставите малку подотворени, за да може воздухот да циркулира и да се намали задржувањето на влага во кабината.