Градоначалникот на Москва, Сергеј Собјанин, изјави дека руските противвоздушни сили до средата наутро уништиле најмалку 14 украински дронови, пишува „Ројтерс“.

Работата на московските аеродроми е нарушена

Клучните аеродроми во Москва не функционираа поголем дел од ноќта, а националниот авиопревозник Аерофлот соопшти дека го менува распоредот на летови поради нарушувањето.

Се очекува 29 светски лидери, меѓу кои и кинескиот претседател Ши Џинпинг, да присуствуваат на одбележувањето на Денот на победата во Втората светска војна во Москва.

Ши треба да започне четиридневна посета на Русија во среда, што ќе му донесе значаен дипломатски поттик на претседателот Владимир Путин, кој сака да покаже дека неговата земја не е изолирана на меѓународната сцена.

Се очекува Ши, чија земја е во трговска војна со САД, да потпише бројни договори со цел продлабочување на веќе цврстото стратешко партнерство „без ограничувања“ со Москва.

И српскиот претседател Александар Вучиќ е на пат кон Москва, но поради воените дејствија привремено слета во Баку.

На видеа од московските аеродроми, објавени на социјалните мрежи, се гледаат голем број патници кои останале заглавени поради доцнење и забрани за летање.

Естонија го забрани прелетот кон Москва

Министерството за надворешни работи на Естонија денеска соопшти дека естонскиот воздушен простор нема да се користи за летови кон и од Москва во рамки на Парадата на 9 Мај.

„Користењето на естонскиот воздушен простор за летови до Москва за парадата на 9 мај не доаѓа предвид, и Естонија нема намера на кој било начин да го поддржи тој настан“, изјави естонскиот министер за надворешни работи Маргус Цахкна, пренесува радиото "EER".

Тој нагласи дека во разговорите со колегите од Европската унија истакнал дека, бидејќи Русија е земја која започна и продолжува војна во Европа, учеството на пропагандни настани организирани од Москва треба да се исклучи.

Естонија веќе забрани ВИП летови од Куба и Бразил кон или од Москва, а дозволите нема да се издаваат, или ќе бидат суспендирани, за кој било ВИП лет кој има цел да присуствува на прославата на 9 мај.

Советски жртви во Втората светска војна

Советскиот Сојуз изгуби 27 милиони луѓе во Втората светска војна, вклучувајќи милиони во Украина, но на крајот ги потисна нацистичките сили назад до Берлин, каде што Адолф Хитлер изврши самоубиство, а црвеното советско знаме на победата беше подигнато над Рајхстагот во 1945 година.

За Русите – и за многу народи од поранешниот Советски Сојуз – 9 мај е најсветиот датум во календарот. Путин, лут поради, како што вели, обидите на Западот да ја потцени советската победа, се обидува да го искористи сеќавањето на Втората светска војна како средство за обединување на руското општество.