Светот сè уште тагува по заминувањето на „народниот папа“, кој допре многу срца за време на неговиот дванаесетгодишен понтификат, додека властите на Ватикан веќе ги започнаа подготовките за погребот на Светиот Отец.

Ритуалот на збогување со поглаварот на Католичката црква е утврден со вековна традиција и обичаи, иако овој „народен папа“ се потруди да отстапи од претходните норми со цел збогувањето да биде поскромно и посимплифицирано.

За почеток, неговото тело беше положено во дрвен ковчег обложен со цинк, во капелата Каса Санта Марта – резиденцијата на папата Франциско за време на неговиот понтификат. За разлика од неговите претходници кои беа погребани во катакомбите на ватиканската базилика Свети Петар, папата Франциско лично побара да биде погребан во импозантната базилика Санта Марија Маџоре, во едноставна и скромна гробница на која сакаше да стои само еден збор – Фрањо.

Базиликата Санта Марија Маџоре, каде што папата Франциско изрази желба да биде погребан, е една од четирите главни папски базилики во Рим и најзначајната црква посветена на Дева Марија. Симболиката е јасна за секој што е запознаен со фактот дека аргентинскиот папа често се молел и барал милост од Богородица.

Легендата за црквата

Базиликата била изградена на ридот Есквилино, еден од седумте римски ридови, во 5 век. Според преданието, Дева Марија му се јавила на папата Либериј во сон и побарала да изгради црква на местото каде што ќе падне снег. Следниот ден, на 5 август, среде лето, на ридот Есквилино навистина паднал снег, поради што ова чудо секоја година се одбележува со бели ливчиња од рози што симболизираат снег. Вреди да се напомене дека токму во оваа базилика се чуваат дрвените даски од јаслите на Исус (Sacra Culla), и дека само папата има право да служи миса на нејзиниот олтар.

Во вторникот, Светата столица го објави првото видео од папата Франциско во отворен ковчег, опкружен со двајца швајцарски стражари. Тој носи бела митра и црвени литургиски одежди, а во скрстени раце држи бројаница.

Погребот на Светиот Отец ќе се одржи на отворено, како што беше случајот и со неговиот претходник Јован Павле Втори. Освен десетици илјади верници, кои ќе имаат можност да му оддадат последна почит на починатиот папа, на погребот ќе присуствуваат и лидери од многу земји ширум светот. Светата миса на плоштадот Свети Петар ќе ја предводи деканот на Колеџот на кардинали, Џовани Батиста.

Кои државници ќе присуствуваат на погребот на папата?

Американскиот претседател Доналд Трамп и неговата сопруга Меланија веќе го потврдија своето присуство, како и украинскиот претседател Володимир Зеленски и првата дама Олена.

Кремљ објави дека претседателот Владимир Путин не планира да присуствува на погребот на папата Франциско, иако Москва ќе испрати свој претставник. Кој точно, сè уште не е јасно. Сепак, треба да се има предвид дека постои логистичка пречка за присуството на Путин, со оглед дека Италија е потписник на Римскиот статут и, според меѓународното право, има обврска (теоретски) да го екстрадира на Хашкиот трибунал, каде што е обвинет за злосторства против човештвото.