Имено на Инстаграм почнаа да се споделуваат фотографии од маички со натпис: „Баш си смешен! Благодарам, но не смеам да консумирам грејпфрут“. Оваа навидум хумористична порака збуни многу следбеници, кои го изразија своето изненадување во коментарите и поставуваа прашања за значењето на натписот.

Зошто грејпфрутот е проблематичен?

Грејпфрутот содржи соединенија кои можат да ја попречат работата на ензимите во нашето тело, особено на ензимот CYP3A4 во тенкото црево. Овој ензим е одговорен за разградување на многу лекови. Кога грејпфрутот ја блокира неговата активност, доаѓа до зголемена концентрација на лекот во крвта, што може да ги зајакне ефектите на лекот, но и да го зголеми ризикот од несакани ефекти. На пример, консумирањето грејпфрут со одредени статини (лекови за намалување на холестеролот) може да го зголеми ризикот од оштетување на мускулите и црниот дроб.

Според достапните податоци, грејпфрутот може да влијае на:

Лекови за намалување на холестеролот: аторвастатин, ловастатин, симвастатин

Лекови за висок крвен притисок: фелодипин, нифедипин, лосартан

Одредени антидепресиви и анксиолитици: буспирон, дијазепам, мидазолам

Лекови за срцев ритам: амиодарон, дронедарон

Антихистаминици: фексофенадин

Меѓутоа ова не е комплетната листа, па затоа е важно да се консултирате со лекар или фармацевт за можните интеракции.

Што да направите ако земате лекови?

Ако редовно консумирате грејпфрут или сок од грејпфрут и земате лекови, задолжително проверете дали вашиот лек реагира со грејпфрут и внимавајте на предупредувањата во упатството за лекот. Доколку постои можност за интеракција, најдобро е да се избегнува консумирање на грејпфрут и неговите производи за време на терапијата.