Преплавени сме со нови серии – "Severance", "Yellowjackets", "White Lotus", и уште многу други. Времето е ограничено, а епизодите се многубројни. Сепак, со нетрпение очекуваме нови сезони, особено кога станува збор за "The Last of Us", која во првата сезона нè воодушеви со некои одлични епизоди.

Измина извесно време откако оваа серија освои нова публика, дури и меѓу оние кои никогаш не чуле за истоимената видео-игра. Таа стана омилена меѓу гледачите, и покрај критиките на некои фанови дека „не е сè како во популарната игра“.

Џоел и Ели се враќаат во април

Џоел и Ели повторно ќе ги гледаме во април, а уште во трејлерот објавен во септември 2024 видовме дека се сè уште тука. Кратки исечоци од серијата веќе со месеци се споделуваат на социјалните мрежи, но целосниот трејлер е нешто сосема друго.

Познато е дека оваа мрачна постапокалиптична драма е базирана на популарната видео-игра, а во новата сезона ќе ги гледаме истите ликови – поминати се пет години од она што го направи Џоел во последната епизода на првата сезона. Светот е уште поопасен, а пријателите не се повеќе исти.

Нови ликови и поширока приказна

Покрај познатите ликови, се појавуваат и некои нови: Џефри Рајт (Westworld, American Fiction) го игра Ајзак, на кој му го позајми гласот и во видео-играта. Кајтлин Девер (Booksmart, Justified) ја доби улогата на Аби, која е клучен лик во продолжението.

Приказната се шири, а како што првата сезона го следеше наративот на првата игра "The Last of Us", така и втората сезона ќе ја преслика "The Last of Us: Part 2".

Тоа не мора да значи дека е добра вест – ако не знаете зошто, наскоро ќе дознаете.

Серијата нема целосно да ја прераскаже втората игра

Иако втората сезона се базира на "The Last of Us Part 2", таа нема да ги покрие сите настани од втората игра. Според продукцискиот тим, ќе бидат потребни барем две сезони за да се пренесе сето уживање и очај од оригиналната приказна.

За оние што сè уште не ја играле играта, но сакаат, тука е "The Last of Us Part II Remastered" за "PC", кој ќе пристигне на "Steam" и "Epic Games" на 3 април – токму на време пред премиерата на втората сезона.